Ireo Loko fampiasa ao am-piangonana sy ny heviny

FOTSY : Loko maneho an'Andriamanitra sy ny voninahiny. Lokon'ny hazavana manjopiaka sy mamirapiratra.
Amin'ny andro fety no ampiasana ity loko ity, dia amin'ny vaninandro Fankalazana ny Noely, ny Paka,ny fahatsiarovana ny Tompo (afa-tsy ny Fijaliany) ; amin'ny fankalazana  sy fahatsiarovana an'i Masina Maria Virjiny, ny Anjely, ny Olomasina rehetra.

MENA : Lokon'ny rà sy ny afo. Loko maneho ny hafanam-po sy ny zotom-po, toy ny afo miredareda. Loko maneho ny Fanahy Masina. Loko maneho ny Maritiry
Ny ampiasana ity loko ity, dia amin'ny fety rehetra fankalazana ny Fanahy Masina, sy ny Alahady Sampakazo (fidiran'ny Tompo ao Jerosalema), ny Zomà Masina, ny andro rehetra ankalazana ny Fijalian'ny Tompo, ny Maritiry

MAITSO : Lokon'ny zava-maniry. Loko mamelombelona aina sy maneho ny fahalehibeazana ara-toetra, taratra ao amin'ny fiainana andavanandro. Loko maneho fanantenana, eo am-piandrasana ny ny fiainana mandrakizay.
Ny ampiasana ity loko ity, dia amin'ny fotoam-pivavahana sy Sorona Vaninandro tsotra mandavantaona.

VOLOMPARASY : Loko maneho fiononana, fibebahana, fivalozana, fanenenana.
Ny ampiasana ity ity loko ity, dia amin'ny fotoanan'ny Fiavian'ny Tompo (Avent) , fotoanan'ny Karemy, amin'ny Sakramentan'ny fampihavanana sy ny fandevenana kristianina.

MAVOKELY : Loko maneho hafaliana sy haravoana. Ny Alahady fahatelo amin'ny Fiavian'ny Tompo sy ny Alahady fahefatra amin'ny Karemy no ampiasan'ny Fiangonana ity loko ity.Tsy dia misy mampiasa firy noho ny tsy fananana ilay loko.

MAINTY : maneho alahelo sy fisaonana. Efa nosoloan'ny Fiangonana volomparasy fa tsy fampiasa intsony.

Mandritra ny Herinandro Masina :
1 - Alahady Sampankazo Loko MENA mandritra ny fahatsiarovana ny fidiran'ny Tompo tao Jerosalema dia azo solona VOLOMPARASY amin'ny fandinihana ny Fijalian'nyTompo.
Fa matetika ny loko MENA no tazomin'ny Fiangonana mandritra ny fankalazana ny Alahady Sampankazo.

2 - Alakamisy Masina : loko FOTSY no ampiasaina

3 - Zoma Masina : loko MENA no ampiasaina

4 - Asabotsy Masina (Alina Masina) : loko FOTSY no ampiasaina

5 - Alahady Paka : loko FOTSY no ampisaina. Ny Paka no Fety lehibe indrindra ao amin'ny Fiangonana.

Mandritra ny Alahady rehetra Fankalazana ny vanim-potoanan'ny Paka (ao anatin'izany ny Alakamisy Fankalazana ny Niakaran'i Jesoa Kristy any an-danitra) dia Fotsy no loko ampiasaina. Ny Pantekôty na ny nidinan'ny Fanahy Masina tamin'ny Apôstôly dia loko Mena. Ary mifarana eo ny antsoina hoe : Vanim-potoanan'ny Paka

ELIASY Liva
Prezidàn’ny FKMP