“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 11 JOLAY 2010	N° 70
ALAHADY FAHA – 15 MANDAVANTAONA – TAONA D

“Mandehana àry, ka manaova toy izany koa” (Lk 10, 37)

“Tompo ô, inona no hataoko mba hahazoako ny fiainana mandrakizay?”. Io no fanontaniana lehibe napetrak’ilay mpampiana-dalàna hakana fanahy an’i Jesoa. Any an-kafa i Jesoa dia namaly mivantana ilay tovolahy mpanan-karena momba io fanontaniana io hoe : “raha te hiditra any amin’ny fiainana ianao, tandremo ny didy”(Mt 19, 17). Eto koa izy dia mbola manantitrantira ihany ny anjara toeran’ny lalàna manontany hoe“Inona no voasoratra ao amin’ny Lalàna ary ahoana no famakinao azy?”. Efa fantatr’ilay mpampiana-dalana izay tokony ho valin-teny. Voalazany tsara sady navondrony amin’ny fototra lehibe ijoroan’ny lalàna, dia ny Lalàn’ny Fitiavana : ny fitiavana an’Andriamanitra sy ny namana. Tsy hoe ivelany izany lalàna izany fa ao anatintsika, “ eo am-bavanao sy ao am-ponao mba hanarahanao azy” araka ny vakiteny I. Io lalàn’ny fitiavana io no mampisy sy mahavelona ny olombelona. Ny fitiavana an’Andrimanitra alohan’ny zava-drehetra dia manosika hitia ny olombelona tsy an-kanavaka manodidina antsika. Ilay mpampiana-dalana anefa tsy nanaiky io fitiavana ny olombelona tsy an-kanavaka io. Ho azy dia misy ireo olona natao ho namana sy ho tiavina, misy ireo olona tsy azo antsoina hoe namana; ohatra amin’izany ireo Samaritana izay tsy nifankahazo tamin’ny Jody.

Iza àry no namako? hoy ilay mpampiana-dalana. Iza tokoa no namana tsy maintsy ho tiavintsika tahaka ny tena araka ny fijerin’i Jesoa? Mamaly izany ny fanoharana momba ilay Samaritana tsara fanahy. Mazava fa Jody ilay voaendaka; ilay Samaritana mpivahiny tsy mifankahazo amin’ny Jody anefa no nanatona namonjy azy. Ireo pretra sy levita iray foko taminy kosa nandalo fotsiny satria voafatotry ny lalàna ivelany, tsy afa-mandoto tena hitakosina amin’ny olona efa ho faty (Lev 21). Koa ny namana ho tiavina lazain’i Jesoa eto dia ireo olona tsy iray foko amin’ny tena, ireo tsy mitovy firazanana amin’ny tena, ireo tsy mitovy finoana amin’ny tena, ireo tsy mitovy firehan-kevitra politika amin’ny tena, ireo mifandrafy sy mety manenjika ny tena aza. Fa fitiavana manao ahoana? Fitiavana tompon’andraikitra, mikatsaka ny soa sy ny tsara ho an’ny hafa. Fitiavana tsy voafatotry ny geja sy ny sakana eto ivelany. Fitiavana mahafoy sy maimaim-poana toy ny an’ilay Samaritana.

“Mandehana àry, ka manaova toy izany koa”. Io no irak’i Jesoa miantefa amintsika. Ny handeha hivoaka amin’ny tontolon’ny tena hanatona sy haneho fitiavana ny hafa, hatramin’ireo tsy mitovy firehana amintsika aza. Io no lalam-pitiavana maha kristianina mitondra amn’ny fiainana. Tsy mora anefa izany fa mila ilay fiorenam-paka amin’ny fitiavana an’Andriamanitra izay manosika antsika hitia ny hafa tsy misy avakavaka.

RAKOTOARISON Jean de Dieu, SJ

Diacre

e

DIMANCHE 11 JUILLET 2010 – MESSE DU 15^ème DIMANCHE DU TEMPS ORDINAIRE

Année C – Couleur liturgique : VERT

& VAKITENY MASINA VOALOHANY
Boky Deterônômy			Det. 30, 10 - 14
Niteny tamin’ny vahoaka Israely I Môizy nanao hoe : “Mihainoa ny feon’ny Tompo Andriamanitrao ianao, ka mitandrema ny didy aman-dalàna voasoratra amin’ity bokin’ny Lalàna ity ; miverena amin’ny Tompo Andriamanitrao, amin’ny fonao manontolo, sy amin’ny fanahinao manontolo. Izao didy andidiako anao izao tsy dia hoe, ambony ho anao na ivelan’ny takatrao. Tsy any an-danitra izy ka hisy hanaovanao hoe : “Iza no hiakatra any an-danitra haka izany ho antsika sy hampahafantatra izany antsika sy mba hanarahantsika azy ?” Tsy any an-dafin’ny ranomasina izany, ka hisy hanaovanao hoe : “Iza no hiampita ny ranomasina haka izany ho antsika, sy hampahafantra izany antsika mba hanarahantsika azy ?” Fa eo akaikinao indrindra ny teny, dia eo am-bavanao sy ao am-ponao, mba hanarahanao azy”.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA FAHAROA
Taratasin’i Md Paoly Apôstôly ho an’ny Kristianina tany Kôlôsy			Kôl. 1, 15 - 20
Ry Kristianina havana, I Kristy Jesoa no Endrik’ilay Andriamanitra tsy hita ; Izy no teraka talohan’izao voaary rehetra izao ; tao Aminy no nahariana ny zavatra rehetra any an-danitra sy ny ety an-tany, dia ny hita sy ny tsy hita, na fiandrianana, na fanjakana na fiamboniana, na fahefana ; taminy sy ho Azy no nahariana ny zavatra rehetra. Izy no talohan’ny zavatra rehetra, ary ao Aminy no aharetan’ny zavatra rehetra. Izy no Lohan’ny tena, izany hoe ny Eglizy ; Izy no voalohany, dia ny voalohan-teraka tamin’ny maty, mba ho Loha amin’ny zavatra Izy, satria ao aminy no sitraky ny Ray hitoeran’ny hafenoana rehetra ; ary tamin’ny alalany no tiany hampihavanana ny zavatra rehetra aminy indray, rehefa nampihavaniny tamin’ny Rany teo amin’ny Hazofijaliana, dia tamin’ny Tenany, na ny ety an-tany n any any an-danitra.
Izany àry ny Tenin’ny Tompo	-	Hisaorana anie Andriamanitra !

& EVANJELY MASINA
Evanjely Masina nosoratan’i Md Lioka			Lk. 10, 25 - 37
Tamin’izany andro izany, nisy mpampiana-dalàna anankiray nitsangana haka fanahy an’I Jesoa ka nanao hoe : “Tompo ô, inona no hataoko hahazoako ny fiainana mandrakizay ?” Dia hoy I Jesoa taminy : “Inona no voasoratra ao amin’ny Lalàna ary ahoana no famakinao azy ?”Ary namaly izy ka nanao hoe : “Tiavo ny Tompo Andriamanitrao amin’ny fonao manontolo sy ny fanahinao manontolo, sy ny herinao manontolo, ary ny sainao manontolo, ary ny namanao tahaka ny tenanao”. Dia hoy I Jesoa taminy : “Marina ny navalinao, manaova izany dia ho ho velona ianao”. Fa nitady hanamarin-tena ralehilahy ka nanao tamin’I Jesoa hoe : “Iza àry no namako ?” Ary hoy I Jesoa taminy : “Nisy lehilahy anankiray nidina avy tany Jerosalema ho any Jerikô, azon’ny jiolahy ka nendahiny ny lambany, nokapohiny ny tenany ary saika maty vao navelany. Dia nisy kosa mpisorona anankiray nidina tamin’izany lalana izany ka nahita azy, nefa nandalo ihany. Toy izany koa ity levita anankiray izay tonga teo, nahita azy, nefa nandalo ihany. Fa nisy kosa Samaritanina anankiray nivahiny tonga teo aminy, ka nangoraka nony nahita azy. Nanatona azy izy, dia namehy ny feriny ary nanisy diloilo sy divay azy, vao nampitaingina azy ny soavaliny, sy nitondra azy tany an-tranom-bahiny ka nitsabo azy. Nony ampitso, dia naka denie roa izy ka nomeny ny tompon-trano, ary nataony hoe : “Tsaboy izy, ary na haotrinona na hoatrinona laninao mihoatra noho ireny, dia honerako rehefa miverina aho”. Iza amin’izy telo lahy no ataonao ho naman’ilay azon’ny jiolahy ?” Dia hoy ilay mpampiana-dalàna : “Ilay niantra azy”. Hoy I Jesoa taminy : “mandehana àry, ka manaova toy izany koa”.
Izany àry ny Tenin’ny Tompo	-	Dera anie ho Anao, ry Kristy !

( fifampizarana

ILAY SAMARITANINA TSARA FANAHY

Ny fifankatiavan’ny Ray sy ny Zanaka ao amin’ny Fanahy Masina no tiany hiainantsika olombelona, ka hahasambatra sy hahafinaritra antsika. Natao hifankatia isika, na avy aiza na avy aiza, na ahoana na ahoana, io no maha-olona antsika. Ny fihavanana amam-pifankatiavantsika no mampiseho mivantana fa mifankatia amin’Andriamanitra isika. Ny fifanatiavana no voalazan’I Kristy fa hahalalana ny mpianany.

Ny volon-koditra, ny vola aman-karena, ny avakavaka ivelany samihafa, ambin-javatra izany, fa ny maha-olona ihany no tena izy ; koa rehefa mety ho olona dia natao hifankatia, natao hiray hina, natao hifanohantohana, natao hifanampy, natao hifampizara, ary natao samy hanana ny anjarany amin’ny fahazoana ny tandrify azy hahamendrika ny maha-olona azy.

Vakio sy dinihontsika àry ny Soratra Masina, dia ho hitantsika fa io fifankatiavana io, dia io ihany, no tena marika ahalalana fa efa iainantsika tokoa ilay aim-baovao iarahantsika ao amin’I Kristy mpandresy

TENY FANOKAFANA

ANDRON’NY TOMPO

¦ soritr’asa manaraka SY VAOVAO SAMIHAFA
1.	HANDRAY NY SAKRAMENTAN’NY BATEMY Ireto indray ny zanaky ny FKMP handray ny Sakramentan’ny Batemy : · Asabotsy 10 jolay 2010 § Vita Batemy omaly RATSIMAMANGA Saroy, (1 taona), teto amin’ny Chapelle Saint Paul , joa miarahaba azy isika mianakavy fa nitombo isa indray ny vahoakan’Andriamanitra. · Hatao any an-tanindrazana : § ANDRIAMANANTENA Dylan Antsa, hatao any Madagasikara miaraka amin'ny mariazin'ny ray aman-dreniny.
2.	FANASANA HANENTANA SORONA MASINA : ALAHADY 29 AOUT 2010 ANY AMETTES (62) Nahazo fanasana avy any amin’ny Fiangonana SAINT SULPICE ao 62 260 AMETTES,any akaikin’ny Arras, avaratry Frantsa, ny FKMP, mba hanentana ny Sorona Masina. Izany dia hatao ny ALAHADY 29 AOUT 2010, amin’ny 11 ora maraina. Ny hira sy ny fihetsika fitondrana ny fanatitra, ny VONINAHITRA, ny MASINA, ary ny ZANAK’ONDRY no angatahina hosahanin’ny FKMP manokana. Ny tolak’andro dia manao RINDRAN-KIRA. Ny Paroasy any no miantoka ny sakafo sy ny fampiantranoana. Misy ampahany kely hiantohany koa amin’ny lasantsy. Koa ireo rehetra izay afaka amin’izany dia misoratra anarana dieny izao, fa ny Asabotsy 28 Aogositra no miainga eto Paris ary miverina ny ampitso Alahady 29 folak’andro. Hisy ny famerenana izay ho hatao mialohan’izany amin’ny vola aogositra..

” FIZARANA ANDRAIKITRA
1.	MANENTANA LITORIZIA : 18/07/2010 : VAOMIERAN’NY TANORA (Alahady faha 16 – Mandavantaona – TAONA D)
2.	MANADIO FIANGONANA : 17/07/2010 : BIRAOM-PIANGONANA