“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 04 JOLAY 2010	N° 69
ALAHADY FAHA – 14 MANDAVANTAONA – TAONA D

I KRISTY NO LALAN-TOKANA - FIADANANA HO ANTSIKA

Iza re no zanak’olombelona tsy mba maniry ny mba ho sambatra ? Eto amin’ity tany fandalovana feno ranomaso sy fijaliana. Feno fitarainana sy fahakiviana. Toa mahatsiaro sambatra koa anefa indraindray arakaraka ny zava-misy sy ny zava-mitranga eo amin’ny fiainana. Dia hoy isika Malagasy : voamaintilany ny fiainana. Mivadibadika eo ny fifaliana sy ny fahoriana. Fahakiviana sy ny fahazotoana. Mitranga izany eo amin’ny lafim-piainana rehetra. Eny na eo amin’ny raharaham-piangonana aza. Ilay finoana miredareda ao anaty, lasa fitsapana mivaivay. Ny fahazotoana mivavaka isan’Alahady, mivadika hakamoana tsy laitra.

Sakramenta roa lehibe no ankalazaintsika izao : dia ny Batemy sy ny Eokaristia. Mitombo ireo zaza vita Batemy, ary torak’izany koa ireo mandray ny Komonio Voalohany eto amin’ny FKMP. Raha nanontanian’ny ny Pretra ireo ray aman-dreny niteraka sy ireo ray aman-dreny mpiantoka ny angatahiny amin’ny Fiangonana dia namaly hoe : NY FINOANA. Ary raha tsy manam-pinoana tsy mandray ny Batemy dia tsy afaka ankalaza ny Eokaristia izay Misterin’ny Finoana. Io ilay Mistery lehibe hambarantsika isan’alahady manao hoe : “Manambara ny nahafatesanao izahay, ry Tompo, mankalaza ny nitsangananao, miandry ny hiavianao amim-boninahitra”. Manambara ny Misterin’ny Fijalian’I Kristy , nefa koa mankalaza ny fandreseny isika. Izay miady amin’ny fahalovana miaraka amin’I Kristy ihany no mandresy

Ny Vakiteny aroson’ny Fiangonana antsika androany àry dia manambara fa Lalan-tokana mankany amin’ny Fiadanana I Kristy. Izy no Fiadanana maharitra ho antsika. Ao amin’ny Eokaristia Izy, ary iainan’ny Fiangonana sy ivelomany ny Eokaristia. Izay ilay fampanantenana fifaliana mandrakizay ho an’I Jerosalema araka ny Mpaminany Izaia ao amin’ny Vakiteny Masina voalohany sy ny Salamo faha-65: “Manaova hobin-kafaliana mankamin’Andriamanitra ry tany rehetra ; hirao ny voninahitry ny Anarany”. Koa manova ny fiainantsika ny Lakroa, ka nahaloa-bava an’I Md Paoly hoe : “Sanatria mba misy ataoko rehareha afa-tsy ny Hazofijalian’I Jesoa Kristy Tompontsika”. Izay ilay Kristy Vaovao Mahafaly anirahana antsika rehetra vita Batemy ka miakara amin’ny toerana ambony mba ho ren-tany, ren-danitra fa efa nandresy niaraka tamin’I Kristy isika. Manara-dia amin’I Kristy isika fa Izy no Lalan-tokana mitondra amin’ny fiadanana. Asehontsika amin’izao tontolo izao fa mifankatia isika, ary fitiavana maharitra mandrakizay izay no fototry ny Fiadanana. Rehefa mifankatia tsara isika eto amin’ny FKMP dia izay no mitory an’I Kristy Fiadanana, I Kristy Vaovao Mahafaly anirahana antsika mianakavy ambara eo amin’ny mpiara-belona amintsika

ELIASY Liva

DIMANCHE 04 JUILLET 2010 – MESSE DU 14^ème DIMANCHE DU TEMPS ORDINAIRE

Année C – Couleur liturgique : VERT

& VAKITENY MASINA VOALOHANY
Bokin’I Izaia Mpaminany			Iz. 66, 10 – 14d
Miaraha mifaly amin’I Jerosalema ianareo, ary miravoravoa noho ny aminy, ianareo rehetra tia azy. Ary aoka hiara-mientan-kafaliana aminy avokoa, ianareo nitomany azy : mba hinonoanareo sy hivokisanareo, amin’ny nonon’ny fampiononany ; ary mba hankafizinareo amim-pahafinaretana, ny hafenoan’ny voninahiny. Satria izao no lazain’ny Tompo : “Indro hataoko misononoka eo aminy, ny fiadanana hoatra ny ony, sy ny voninahitry ny firenena, hoatra ny renirano tondraka” ; ka ianareo dia hampinonoina, hotrotroina, ary hosafosafoina eo am-pofoana. Hoatra ny olona alàn-dreniny alahelo, no hanalako alahelo anareo, ka dia ho afaka alahelo ao Jerosalema ianareo. Hahita izany ianareo, ka ho faly ny fonareo, ary hahazo aina indray hoatra ny ahi-maitso ny taolanareo. Hataon’ny tanan’ny Tompo izay hahalalan’ny mpanompony Azy.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA FAHAROA
Taratasin’i Md Paoly Apôstôly ho an’ny Kristianina tany Galasia			Gal. 6, 14 – 18
Ry Kristianina havana, raha ny amiko dia sanatria mba misy ataoko rehareha afa-tsy ny Hazofijalian’I Jesoa Kristy Tompontsika, fa taminy no voafantsika tamin’ny Hazofijaliana izao tontolo izao ho ahy, ary izaho ho an’izao tontolo izao. Tsy mampaninona na ny famoràna na ny tsy famoràna, fa ny olom-baovao no tena zavatra. Ho an’izay rehetra hanaraka ity fitsipika ity anie, sy ho an’I Israelin’Andriamanitra koa, ny fiadanana amam-pamindràm-po ! Amin’izao sisa izao, aza misy manahirana ahy intsony, fa mitondra ny marik’I Jesoa amin’ny vatako aho. Ho amin’ny fanahinareo anie, ry Kristianina havana, ny fahasoavan’I Jesoa Kristy Tompontsika ! Amen.
Izany àry ny Tenin’ny Tompo	-	Hisaorana anie Andriamanitra !

& EVANJELY MASINA
Evanjely Masina nosoratan’i Md Lioka			Lk. 10, 1 – 12. 17 – 20
Tamin’izany andro izany, ny Tompo nifidy roa amby fitopolo lahy hafa koa tamin’ny mpianany, ka naniraka azy tsiroaroa hialoha Azy, any amin’ny tanàna sy ny tany rehetra izay efa halehany. Ary hoy Izy tamin’izy ireo : “Be ny vokatra, fa ny mpijinja no vitsy ; koa mangataha amin’ny tompom-bokatra mba hanirahany mpiasa hijinja ny vokany. Mandehana ; indro Aho maniraka anareo tahaka ny zanak’ondry eo afovoan’ny ambodia. Aza mitondra kitapom-bola na kitapo hafa, na kiraro, ary aza miarahaba olona akory any an-dalana. Amin’izay trano hidiranareo, dia milazà aloha hoe : “Fiadanana anie ho amin’ity trano ity ; ka raha misy zanaky ny fiadanana ao, dia ao aminy ny fiadanana lazainareo ; fa raha tsy misy kosa, dia hiverina aminareo ihany izany. Ary mitoera amin’izany trano izany, ka mihinàna sy misotroa izay misy ao, fa mendrika ny karamany ny mpiasa. Aza mifindrafindra trano. Ary amin’izay tanàna hidiranareo, raha mandray anareo ny olona, dia hanao izay atolony anareo ; ary sitrano ny marary izay ao, ka lazao hoe : Efa mby akaiky anareo ny Fanjakan’Andriamanitra”. “Fa amin’izay tanàna hidiranareo koa anefa tsy mandray anareo ny olona, dia mankanesa eny an-kianja ka lazao hoe : Na ny vovoky ny tanànanareo nipetaka tamin’ny tongotray aza dia ahintsanay hiampanga anareo ; fantaro anefa fa efa akaiky ny Fanjakan’Andriamanitra. Lazaiko aminareo fa amin’izany andro izany, dia ho moramora kokoa ny ho amin’I Sôdôma, noho ny ho amin’izany tanàna izany”. Ary niverina tamin-kafaliana ny roa amby fitopolo lahy ka nanao hoe : “Tompo ô, na dia ny demony aza dia manaiky anay noho ny Anaranao”. Dia hoy I Jesoa taminy : “Nahita an’I Satana nilatsaka avy tany an-danitra toy ny varatra Aho. Indro efa nomeko ny fahefana hanitsaka ny bibilava sy ny maingoka mbamin’ny hery rehetra ananan’ny fahavalo ianareo, ka tsy hisy hampaninona anareo akory ireny. Tsy noho ny fanahy ratsy manaiky anareo anefa no tokony hifalianareo, fa noho ny anarenareo efa voasoratra any an-danitra no ifalio”.
Izany àry ny Tenin’ny Tompo	-	Dera anie ho Anao, ry Kristy !

( fifampizarana

« Be ny vokatra fa ny mpijinja no vitsy » : fantatsika tokoa io tenin'i Kristy io , ary mbola manohy iny taona natokana ho an'ny pretra nankalazaintsika iny.

Rahefa mandray ny Sakramentan'ny batemy isika dia tonga « mpisorona, mpaminany ary mpanjaka » ka manana adidy noho izany ho mpitory an'i Kristy Vaovao Mahafaly maty sy nitsanga-ko velona ho famonjena antsika.

Nalefan'i Jesoa tsiroaroa ny mpianany hitory ny Vaovao Mahafaly. Tsiroaroa satria tsy miasa irery isika fa efa endriky ny Fiangonana sahady izany. Ireo izay nanaraka an'i Kristy no lasa mpanambara Azy. Nirahiny hanambara fa mby akaiky ny Fanjakan'Andriamanitra.

Feno hafaliana tokoa ireo mpianany teo am-panatanterahana izany iraka izany : iza tokoa moa no tsy ho faly rahefa manambara Vaovao Mahafaly amin’ireo olona anirahana azy ?

Fanehoana fahatokisana avy amin'i Jesoa ny nifidianany azy ireo Toa izany isika rahefa mandray Sakramenta : Andriamanitra no nifidy antsika sy niantso antsika.

Izany no tokony hireharehantsika: raha mandresy ny ratsy isika, noho ny fahefana nomen’Andriamanitra antsika amin'ny alalan'ny batemy, dia tsy ny fanahy ratsy resintsika no tokony hifaliantsika, fa noho isika voavonjy ary lasa mpandray anjara amin'ny Fanjakan'Andriamanitra.

Mila mpianatra hanambara tokoa ny maha akaikin’Andriamanitra antsika mba hahafahan’ny olona rehetra handray sy hifampizara ny hafaliana vokatr’izany. Mila iainantsika anefa aloha izany hafaliana izany ka tokony ho hita taratra eo amin’ny fiainantsika isan'andro.

Fara RASOLOJAONA

Vaomieran’ny Finoana – Antoko Mpihira FEON’ANJOMARA

¦ soritr’asa manaraka SY VAOVAO SAMIHAFA
1.	KOMONIO VOALOHANY, ASABOTSY 03 JOLAY 2010 : Ny Asabotsy 03 Jolay 2010 tamin’ny 10 ora sy sasany No nanao Komonio Voalohany ny zanatsika 7 mianadahy eto amin’ny FKMP. Izany dia natao tany amin’ny. Fiangonana Saint Dominique, 16, rue Tombe Issoire – Paris 14ème Métro : Saint-Jacques (Ligne N°6) Koa miarahaba azy ireo isika mianakavy. Ireto avy ireo ankizy ireo : RAMIHONE Tanjona, RAKOTO ANDRIANARY Dylan, RAHELISON Manda, RAKOTOARIMANANA Miarana, ANDRIANJANAHARY Naly, RAVELOJAONA Pierre, RANDRIANJANAKA Sariaka. Vita Batemy kosa ny : · Asabotsy 03 jolay 2010 : § RANDRIANANDRASANA Tia Hajaina, (1 taona)
2.	HANDRAY NY SAKRAMENTAN’NY BATEMY Ireto indray ny zanaky ny FKMP handray ny Sakramentan’ny Batemy · Alahady 04 jolay 2010 § RAKOTOARINORO Nampoina Ando, (13 taona) mandritra ny Lamesa. · Asabotsy 10 jolay 2010 § RATSIMAMANGA Saroy, (1 taona) amin’ny 2 ora sy sasany (14h 30mn). § ANDRIAMANANTENA Dylan Antsa, hatao any Madagasikara miaraka amin'ny mariazin'ny ray aman-dreniny.

” FIZARANA ANDRAIKITRA
1.	MANENTANA LITORIZIA : 11/07/2010 : FILAN-KEVITRA PASTÔRALY (Alahady faha 15 – Mandavantaona – TAONA D)
2.	MANADIO FIANGONANA : 10/07/2010 : VAOMIERAN’NY TANORA

Rakitra SY VOKATRA SAMIHAFA	27/06/2010	176,59 €
	Rakitra volana Jona 2010	649,32 €