“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 13 JONA 2010	N° 66
ALAHADY FAHA – 11 MANDAVANTAONA – TAONA D

« Voavela ny helokao »

Tsy azo iainana amin’izao vaninandro sy vanim-potona iainantsika izao ny zavatra nataon’ity vehivavy ratsy fitondran-tena tantarain’i Md Lioka ao amin’ny Evanjely androany ity. Kanefa dia modely kosa ho antsika kristianina raha ny ezaka nataony hialana amin’ny fomba ratsiny.

Tsy azo iainana satria tsy mahalala fomba izy : miditra tsy nasaina ao an-tokantranon’olona nanasa an’i Jesoa, nitomany sady nanasa ny tongotr’i Jesoa tamin’ny volony mandritra ny sakafo. Raha any amin’ny tanin’ny Silamo sy ny Jody dia tena tantara tsy vita eo amin’ny fiarahamonina ny fampisehoana ny volo indrindra fa namafana tongotr’olona. Azo fitinina amin’ny teny tokana hoe : nanakorontana ny sakafo niarahan’i Jesoa sy ilay Farisianina ary ny fiarahamonina ny ataon’io vehivavy io.

Modely anefa io vehivavy io ho antsika satria niaiky ny fahotana vitany izy. Leo, tofoka, tsy te hiverina amin’ny fiainam-pijangajangana intsony izy. Hany ka ny fitaovana entiny miasa : ny ranomanitra entina hisarihana ny lehilahy sy ny volo izay haingon’ny vehivavy mariky ny hatsaràna sy fahamendrehana dia nararany sy namaohany ny tongotr’I Jesoa. Nahagaga an’I Jesoa io fihetsika mampiseho fitiavana Azy io. Iza amintsika tokoa moa no hahavita toy ny nataon’io vehivavy io ? Hanasa tongotr’olo-tiana amin’ny ranomaso sy nandraraka ranomanitra ny tongony ? Nataon’io vehivavy io ho toy ny tsinontsinona ny zavatra rehetra raha oharina amin’I Jesoa. Ary ho valin’izay fitiavany an’I Jesoa izay dia navelan’I Jesoa ny helony. “Ravehivavy, voavela ny helokao” hoy Izy.

Mampatsiahy antsika ny halehiben’ny Sakaramentan’ny Fampihavanana (Konfesy), izay Sakramenta tsy misy mpandray loatra intsony amin’izao fotoana izao ity Evanjely ity. Sakramenta izay hanehon’Andriamanitra ny famindram-pony amintsika olombelona mpanota. Tsy misy tsy diso isika olombelona mandia tany fa Andriamanitra kosa miantra sy mamindra fo raha mitodika Aminy isika. Napetrak’I Jesoa amin’ny Fiangonana Vatany Masina io fitantanana ny Sakramentan’ny Fampihavanana io : “ny fahotana izay havelanareo dia ho voavela, ary izay hotananareo dia ho voatana” Jn 19, 23.

Koa aza misalasala manatona ny Fiangonana.

P. Edmond RAKOTONDRAMANANA

Aumônier

DIMANCHE 13 JUIN 2010 – MESSE DU 11^ème DIMANCHE DU TEMPS ORDINAIRE

Année C – Couleur liturgique : VERT

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

& VAKITENY MASINA VOALOHANY
Boky faharoan’i Samoela			2 Sam. 12, 7 – 10. 13
Tamin’izany andro izany, hoy i Natàna tamin’i Davida : “Izao no lazain’ny Tompo Andriamanitr’i Israely : Nanosotra anao ho mpanjaka amin’i Israely Aho, ary nanafaka anao tamin’ny tanan’i Saola ; ny tranon’ny tomponao nataoko teo ampofoanao ; ny taranak’i Israely sy i Jodà natolotro anao ; ary raha kely loatra izany, mbola hoampiko izao sy izao koa. Ka nahoana no nanamavo ny Tenin’ny Tompo ianao, fa nanao izay ratsy teo imasony ? I Oria Heteanina nasianao ny sabatra, ny vadiny nalainao ho vady, izy novonoinao tamin’ny sabatry ny taranak’i Amôna. Koa ankehitriny noho ianao nanamavo Ahy, sy naka ny vadin’i Oria Heteanina ho vadinao, dia tsy hiala amin’ny taranakao mandrakizay kosa ny sabatra”. Dia hoy i Davida tamin’I Natàna : “Nanota tamin’ny Tompo aho !” Fa hoy kosa i Natàna tamin’i Davida : “Navelan’ny Tompo ny helokao, ka tsy ho faty ianao”.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA FAHAROA
Taratasin’i Md Paoly Apôstôly ho an’ny Kristianina tany Galasia			Gal. 2, 16. 19 – 21
Ry Kristianina havana, nony fantatsika fa tsy ny asan’ny Lalàna no anamarinana ny olona, fa ny finoana an’I Jesoa Kristy, dia mba nino an’I Kristy Jesoa koa isika, mba hohamarinina amin’ny finoana Azy, fa tsy amin’ny asan’ny Lalàna, satria tsy misy nofo hohamarinina amin’ny Lalàna. Noho ny Lalàna no nahafatesako ny amin’ny Lalàna, mba ho velona ho an’Andriamanitra aho. Niara-nofantsihina tamin’I Kristy teo amin’ny Hazofijaliana aho, ka matoa velona aho, dia tsy izaho intsony no velona, fa I Kristy no velona ato anatiko. Eny, izao ahavelomako amin’ny nofo ankehitriny izao no ahavelomako amin’ny finoana ny Zanak’Andriamanitra, Ilay efa tia ahy sy nanolo-tena hamonjy ahy. Amin’izany, dia tsy mahafoana ny fahasoavan’Andriamanitra aho ; fa raha ohatra ka avy amin’ny Lalàna kosa ny fahamarinana, dia ho maty foana I Kristy.
Izany àry ny Tenin’ny Tompo	-	Hisaorana anie Andriamanitra !

& EVANJELY MASINA
Evanjely Masina nosoratan’i Md Lioka			Lk. 7, 36 – 8, 3
Tamin’izany andro izany, nisy Farisianina anankiray nanasa an’I Jesoa hiara-mihinana aminy, ka niditra tao an-tranon’ilay Farisianina Izy, dia nipetraka nihinana. Ary indro nisy vehivavy anankiray ratsy fitondran-tena tao an-tanàna nahalala fa nihinana tao an-tranon’ilay Farisianina I Jesoa, ka dia nivimbina tavoara alabastra feno diloilo manitra, dia nijanona teo ivohony tanilan’ny tongony sady nitomany, ka kotsan’ny ranomasony ny tongony ; fa nofaohiny tamin’ny volon-dohany sy norohany, ary nohosorany diloilo manitra. Nony nahita izany ilay Farisianina nanasa Azy, dia nanao anakam-po hoe : “Raha mpaminany Izy dia ho nahalala ny toetran’ity vehivavy mikasika Azy, fa hoe mpanota io”. Ary I Jesoa niteny taminy nanao hoe : “Ry Simôna, misy zavatra holazaiko”. Dia hoy izy : “Lazao, ry Mpampianatra”. Ary hoy I Jesoa : “Nisy olona roa lahy nananan’ny mpanjana-bola anankiray trosa, ny iray nananany denie dimanjato, ary ny iray dimampolo. Noho izy ireo samy tsy nanan-kaloa, dia nafoiny ny trosa tamin’izy roa lahy. Koa iza amin’ireo no ho tia azy kokoa ?” Dia hoy I Simôna namaly Azy : “Ataoko fa ilay namoizany bebe kokoa”. Ary hoy Izy taminy : “Marina ny anao”. Dia nitodika an-dravehivavy Izy ka nanao tamin’I Simôna hoe : “Hitanao va io vehivavy io ? Niditra teto an-tranonao Aho, fa ianao tsy nanome rano hanasako tongotra. Izy kosa nanondraka ny tongotro tamin’ny ranomasony sy namaoka azy tamin’ny volon-dohany. Ianao tsy nanoroka Ahy, izy kosa tsy nitsahatra nanoroka ny tongotro hatrizay nidirako ; Ianao tsy nanosotra diloilo ny lohako, izy kosa nanosotra diloilo manitra ny tongotro. Noho izany dia lazaiko aminao fa voavela ny heloka be nataony satria be fitiavana izy ; fa izay amelana kely no kely fitiavana”. Dia hoy I Jesoa tamin-dravehivavy : “Voavela ny helokao”. Ary izay niara-nihinana taminy nanao anakampo hoe : “Iza moa ity mamela na dia ny heloka aza ?” Fa hoy Izy tamin-dravehivavy : “Ny finoanao no nahavonjy anao, mandehana amim-piadanana”. Taorian’izany, dia lasa nitety ny tanàna sy ny vohitra Izy nampianatra sy nitory ny Evanjelin’ny Fanjakan’Andriamanitra. Nanaraka Azy ny roa ambin’ny folo lahy sy ny vehivavy sasany nositraniny tamin’ny fanahy ratsy sy ny aretina, dia I Maria atao hoe Madelenina izay nivoahana demony fito, i Joana vadin’i Kozà mpitandrina ny fananan’i Herôda, ary i Sozàna mbamin’ny maro hafa koa, izay nanampy Azy tamin’ny fananany.
Izany àry ny Tenin’ny Tompo	-	Dera anie ho Anao, ry Kristy !

( fifampizarana

“Miantra sy be indrafo Andriamanitra”

Fitiavana lehibe tokoa ny fitiavan'Andriamanitra antsika : “nomeny ny Zanany Lahitokana mba tsy ho very izay rehetra mino azy”.

Inona anefa no havalintsika izany fitiavana sarobidy izany ?

Tsy sasatra ny manota isika, tsy manao afa-tsy ny mivily lalana; dia manontany tena foana hoe: nahoana re no tsy jeren'Andriamanitra izao fahoriako izao ?

Fa toa tsy mba tsaroana ny hoe: nahoana aho no maniasia toy izao ?

Tsarovy fa diso mamin'Andriamanitra loatra isika, te hiditra eo amin'ny fiainantsika Izy, te hamonjy antsika ary tsy mba mandao antsika Izy n'inona rahoraho ataontsika Aminy.

Koa aza misalasala fa meteza hanatona Azy toa an'i Davida sy ilay vehivavy ratsy fitondran-tena satria izy efa nanadio sy namela ny helokao.

Sokafy ny fonao handray Azy dia hohenika ny fanahiny ianao ary hodiboky ny hafaliana ny ao anatinao.

ZOARIMAMY

Vaomieran’ny Fitantanana

¦ soritr’asa manaraka SY VAOVAO SAMIHAFA
1.	ANTSAM-PANAHY LEHIBE, ASABOTSY 19 JONA 2010 : “GASIKARANAY VONJEO”, izany no lohahevitra hanentanan’ny Antoko Mpihira ny aingam-panahintsika amin’ny Antsam-panahy lehibe izay hataon’izy ireo ny Asabotsy 19 Jona 2010 manomboka amin’ny 7 ora sy sasany hariva ao amin’ny Crypte Saint Dominique (Paris 14 ème). Ny fandraisana anjara dia 10 euros. Ilazao ny havana aman-tsakaiza hitondra amam-bavaka an-kira ny tanindrazantsika. Tongava hifanotrona am-bavaka ho an’ny tanindrazana.
2.	FFKM – FRANTSA, HO AN’NY TANINDRAZANA, ASABOTSY 26 JONA 2010 : Ny Asabotsy 26 Jona 2010, fankalazana ny faha-50 taona nahazoan’i Madagasikara ny fahaleovantenany, dia hisy fiaraha-mivavaka iraisam-pinoana karakarain’ny FFKM-FRANTSA. Izany dia hatao ao amin’ny Fiangonana Notre-Dame des Champs 91, Bd Montparnasse (Paris 6 ème). Métro: Montparnasse Manomboka amin’ny 3 ora sy sasany tolak’andro
3.	LAMESA LEHIBE AO AMIN’NY CATHEDRALE NOTRE-DAME, ASABOTSY 26 JONA 2010 : Araka ny efa nolazaina tamintsika koa dia hisy lamesa lehibe ao amin’ny Cathédrale Notre-Dame de Paris tarihan’ny Kardinaly André VINGT-TROIS, arsevekantsika eto Paris. Ny fotoana dia hanomboka amin’ny 10 ora maraina. Manana anjara toerana sy andraikitra amin’izany isika FKMP, koa mampiomana anao dieny mialoha. RER C  : Cluny/Notre-Dame na Metro : Cité

” FIZARANA ANDRAIKITRA
1.	MANENTANA LITORIZIA : 20/06/2010 : VAOMIERAN’NY FIARAHA-MONINA (Alahady faha-12 – Mandavantaona Taona D, sady fetin’ny ray - fête des pères)
2.	MANADIO FIANGONANA : 19/06/2010 : VAOMIERAN’NY FIFANDRAISANA