“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 09 MAY 2010	N° 62
ALAHADY FAHA – 6 FANKALAZANA NY PAKA – TAONA D

Ampy hahavonjy ny finoana an’i Kristy

Tao aorian’ny fitsanganan’I Jesoa tamin’ny maty dia niely be ny lazany ary maro ireo tsy jody nino Azy. Indrisy anefa fa vao nanomboka nino izy ireo dia niharan’ny fanafitohinana avy amin’ireo Jody mihevi-tena ho mpahay sy mpitandrina ny lalàna. Nampianatra azy ireo antsokosoko tsy niera tamin’ny apostoly mpiandraikitra ny pastoraly ireo jody ireo nanao hoe : “raha tsy forana araka ny lalan’i Moizy ianareo, dia tsy ho voavonjy”.(Vakiteny N°1). Namaky loha ny apostoly ny zava-misy satria ireo olona vao nino ireo dia olona tsy misy ifandraisany amin’ny lalan’i Moizy satria tsy Jody. Ny hany nandresy lahatra azy ireo dia ny maha Andriamanitra an’i Jesoa ka nahatonga azy ireo hino. Niakatra hatrany Jerosalema ny raharaha ary ny niafarany dia tsy voatery ho forana vao voavonjy fa ny finoana an’i Kristy no mahavonjy. Ny lalana nisy teo aloha dia mbola tao anatin’ny fanekempihavanana taloha ary lalana nentina hanabeazana ireo jody vao nivoaka avy tamin’ny tanin’ny tsy mpino. Ankahitriny ireo lalana taloha ireo dia efa nosoloina ny fanekempihavanana vaovao dia ny nanaovan’ Jesoa sorona ny tenanay mba hanavotana ny olon-drehetra. Noho izany dia tsy ampy ny manaraka ny lalan’i Moizy raha tiana ny ho voavonjy fa tsy maintsy mandray an’I Kristy ilay Fitiavana.

Olana mbola mipetraka eo amin’ny fiangoanana ankehitriny io olana niseho tamin’ny kristianina tany amboalohany io. Misy ireo kristiana katolika izay mbola mitana ny zavatra nisy talohan’ny vatikana faha-2 ka tsy mihevitra velively ny hampifanaraka ny finoana amin’ny zava-misy iainany. Manasaraka tsotra izao ny finoana sy ny fiainana an-davan’andro. Ary vokatr’izany dia maro amin’izay ireny ny tsy mankatoa ny papa rehefa niaina ny vatikana faha-2. Ao koa ireo makatoa ny vatikana faha-2 nefa tsy miaina azy araka any tokony ho izy ka mampianatra antsokosoko ny olona nefa tsy nahazo alalana tamin’ny Eveka hany ka manjary mampikorotana olona satria tsy hita intsony izay pastoraly harahina na ny an’i Eveka na any azy.

Koa mivavaha isika mba ho voahaja hatrany ny rafitra antanatohatra misy eo amin’ny fiangonana.

P. Edmond RAKOTONDRAMANANA

Aumônier

DIMANCHE 09 MAI 2010 – MESSE DU 6^ème DIMANCHE DE PÂQUES

Année C – Couleur liturgique : BLANC

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

ÿ Regina caeli

Ry Mpanjakavavin’ny lanitra mifalia, Aleloia !

- Satria Ilay nentinao tany am-bohoka, Aleloia !

Dia efa nitsangan-ko velona araka ny teniny, Aleloia !

- Mivavaha amin’ Andriamanitra ho anay, Aleloia !

Mifalia sy miravoa, ry Maria Virjiny, Aleloia !

- Satria nitsangan-ko velona tokoa ny Tompo, Aleloia !

Aoka isika hivavaka

Ry Andriamanitra, Ianao nampientan-kafaliana an’izao tontolo izao tamin’ny nitsanganan’I Jesoa Kristy Zanakao Tomponay ; koa mihanta aminao izahay , enga anie noho ny vavak’I Maria Virjiny dia mba homenao anay ny fiainantsambatra mandrakizay . Amin’ny alalan’I Kristy Tomponay. Amen.

& VAKITENY MASINA VOALOHANY
Boky mitantara ny Asan’ny Apôstôly			Asa 15, 1 – 2. 22 – 29
Tamin’izany andro izany, nisy olona nidina avy tany Jodea nampianatra ny mpino vahiny tao Antiôkia hoe : « Raha tsy foràna araka ny lalàn’i Môizy ianareo, dia tsy ho voavonjy ». Ka nony efa nifanditra sy niady hevitra mafy tamin’ireo i Paoly sy i Barnabe, dia izao no hevitra nifanarahana : hiara-miakatra any Jerosalema i Paoly sy i Barnabe, ary ny sasany amin’izy an-daniny, handinika amin’ny Apôstôly sy ny Pretra ilay zavatra niadiany hevitra. Nankasitrahin’ny Apôstôly sy ny Pretra mbamin’ny Eglizy rehetra, ny fanazavana nataon’i Piera sy i Jakôba ; ka nifidy ny sasany tamin’izy rehetra izy ireo, mba hirahina ho any Antiôkia hiaraka amin’i Paoly sy Barnabe : dia i Joda izay atao hoe Barsabasy, sy i Silasy, lehilahy lohandohany tao amin’ny mpino, no laniny. Ka izao no taratasy nampitondrainy azy ireo : « Ny Apôstôly sy ny Pretra ary ny havana iray finoana, avy miarahaba ny havana any amin’ny Jentily, izay any Antiôka sy Siria ary Silisia. Noho ny nandrenesanay fa nisy olona avy taty aminay, izay tsy nahazo teny taminay velively, nampitabataba anareo tamin’ny teniny sy nampitebiteby ny sainareo, dia nivory izahay rehetra, ka nifanara-kevitra ny hifidy olona hirahina ho any aminareo, hiaraka amin’i Barnabe sy i Paoly malalanay, lehilahy nanao vy very ny ainy ho voninahitry ny Anaran’I Jesoa Kristy Tompontsika. Koa indreny i Joda sy i Silasy nirahinay hilaza am-bava izany zavatra izany aminareo. Sitraky ny Fanahy Masina sy izahay ny tsy hampitondra ny mavesatra anareo, afa-tsy izao zavatra tsy maintsy tandremana izao : dia ny hifadianareo ny hena natolotra tamin’ny sampy, sy ny ra, ary ny biby nokendaina, mbamin’ny fijangajangana; soa ho anareo ny mifady an’izany Veloma ».
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA FAHAROA
Boky Fanambaràna nosoratan’i Md Joany			Apôk. 21, 10 – 14. 22 – 23
Izaho, Joany, dia nentin’ny Anjely am-panahy tany amin’ity tendrombohitra, sady lehibe no avo ka nasehony ahy ny tanàna masina, dia I Jerosalema nidina avy any an-danitra, avy amin’Andriamanitra. Namirapiratry ny voninahitr’Andriamanitra izy ary voazavan’ny kintana sy ny vato sarobidy, dia ny vato jaspa izay azo itarafana toy ny kristaly. Sady avo no lehibe ny mandany, ary roa ambin’ny folo ny vavahadiny ; nisy Anjely roa ambin’ny folo tamin’ireo vavahady ireo, ary nisy anarana voasoratra koa, dia ny anaran’ny foko roa ambin’ny folon’i Israely. Vavahady telo no eo atsinanana, vavahady telo no eo avaratra, vavahady telo no eo atsimo, vavahady telo no eo andrefana. Misy vato fanorenana roa ambin’ny folo ny mandan’ny tanàna ; ary misy anarana roa ambin’ny folo amin’ireo, dia ny anaran’ny Apôstôly roa ambin’ny folon’ny Zanak’ondry. Tsy nahita tempoly tao aho, fa ny Tompo Andriamanitra mahefa ny zavatra rehetra sy ny Zanak’ondry no Tempoliny. Tsy mila masoandro ny tanàna, na volana hanazava azy, fa ny voninahitr’Andriamanitra no fanilony.
Izany àry ny Tenin’ny Tompo	-	Hisaorana anie Andriamanitra !

& EVANJELY MASINA
Evanjely Masina nosoratan’i Md Joany			Jo. 14, 23 – 29
Tamin’izany andro izany I Jesoa nilaza tamin’ny mpianany hoe : « Raha misy tia Ahy dia hitandrina ny teniko izy, ka ho tian’ny Raiko, ary hankao aminy Izahay ka honina ao aminy. Fa izay tsy tia Ahy kosa, dia tsy mitandrina ny teniko ; ary ny teny izay renareo, dia tsy Ahy, fa an’ny Ray izay naniraka Ahy. Voalazako taminareo izany, raha mbola mitoetra eto aminareo Aho. Fa ny Mpanafaka alahelo, dia ny Fanahy Masina, Izay hirahin’ny Ray amin’ny Anarako, no hampianatra anareo ny zavatra rehetra, sy hampahatsiaro anareo ny zavatra rehetra nolazaiko taminareo. Fiadanana no avelako aminareo, ny fiadanako no omeko anareo, tsy mba tahaka ny fanomen’izao tontolo izao no omeko anareo. Aoka tsy hitebiteby na hatahotra ny fonareo. Efa renareo izao voalazako taminareo : Handeha Aho, nefa mbola hiverina ho aty amainareo. Raha tia Ahy ianareo, dia ho faly tokoa amin’izao handehanako ho any amin’ny Ray izao, satria lehibe noho Izaho ny Ray. Ary Izaho no milaza izany aminareo dieny ankehitriny mbola tsy tonga izany, dia ny mba hinoanareo rehefa tonga izany ».
Izany àry ny Tenin’ny Tompo	-	Dera anie ho Anao, ry Kristy !

( fifampizarana

Amin'izao fotoana manakaiky ny fiakaran'i Jesoa any amin'ny Ray izao dia manomboka manome ny fepetra rehetra tokony ho arahintsika Izy amin'izao Vakiteny telo androany izao : manambara fa izay tia Azy dia mitandrina ny didiny sy ny teniny, ary koa milaza sy mampahery ny voninahitr'Andriamanitra sy ny Fanahy Masina.

Isika kristianina tsirairay avy dia mahalala tsara ny toro-marika rehetra momba izany, dia tsy ho atoro ny voanjo ho hadiana. Samy manana ny anjara toerany, mba hahatontosa izany. Amin'ny maha olombelona antsika anefa, nifanarahana ny tenin'ny Soratra Masina, sy ny didin'Andriamanitra dia tsy mora tokoa, koa izany indrindra no andeha hiarahantsika hiombom-bavaka mba hampisy vokany ny ezaka izay ataon-tsika miaraka amin'ny Fanahy Masina, mizotra amin'ny lalana mahitsy.

Marie-Thomas

Vaomieran’ny FIARAHA-MONINA

¦ soritr’asa manaraka SY VAOVAO SAMIHAFA
1.	FITSANGATSANGANAN’NY ANKIZY, ASABOTSY 05 JONA 2010 : Mahafaly ny Vaomieran’ny KOLONTSAINA ny manao izao filazana izao. Mampandre anareo Ray aman-dreny izahay fa hisy fitsangatsanganana izay entanin'ny Vaomieran'ny Kolontsaina ny Asabotsy tontolo andron'ny 5 Jiona 2010, izay atao ao amin'ny Parc des Sceaux (92). Ary iarahana amin'ny ankizy sy ny ray aman-dreny. Manantena anareo dieny izao mba hamandrika izany fotoana izany, ary hanoratra anarana sy hampilaza ny mpiandraikitra na ho afaka na tsia alohan'ny 23 May 2010 mba hahamora ny fikarakarana sy ny enti-manana ny amin'izany. Dia samia mitondra am-bavaka ny fahatanterahan'ny fotoana. Tahian'Andriamanitra daholo Mirary soa ny rehetra. Bakoly Nirina RANDRIAMANANTENA Vaomieran'ny KOLONTSAINA
2.	FIVORIAN’NY FILAN-KEVITRA PASTÔRALY, ANDROANY ALAHADY 09 MAY 2010 Aorian’izao Lamesa izao dia hivory ny Filan-kevitra Pastôraly. Ny tanisa dinika dia ny Jery todika tamin’ny fetintsika farany teo ary ny fiomanana amin’ny Zaikabe 2010.
3.	FIANTSOANA FIVORIANA : Ho fanomanana ny Zaikabe dia antsoina ny mpikambana ao amin’ny Vaomieran’ny FITANTANANA sy ny Vaomieran’ny FIFANDRAISANA hivory amin’ny Alahady 16 May 2010 amin’ny 2 ora sy sasany eto amin’ny Chapelle Saint Paul.
4.	ZAIKA BE ANY “PARAY – LE – MONIAL”, 22 – 23 – 24 MAY 2010 : Ny Alahady 16 May 2010 izao no fiomanana farany amin’ny Zaikabe, hatao aorian’ny Lamesa. Koa antsoina ireo rehetra handeha any amin’ny Zaikabe mba ho tonga daholo. Misy ny fampahafantarana ny hatao any sy ny Toerana. Momba ny fampiantranoana. Eo koa ny torimarika farany homena antsika rehetra.

” FIZARANA ANDRAIKITRA
1.	MANENTANA LITORIZIA : 16/05/2010 : BIRAOM-PIANGONANA (Alahady faha- 7 fankalazana ny PAKA)
2.	MANADIO FIANGONANA : 15/05/2010 : VAOMIERAN’NY KOLONTSAINA