“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 25 Avrily 2010	N° 60
ALAHADY FAHA – 4 FANKALAZANA NY PAKA – TAONA D

FETIN’NY MPIANDRY ONDRY TSARA

I Kristy tafatsangana-ko velona, no ankalazaintsika anio. Izy no Ilay Mpiandry Ondry tsara.

Mahafantatra antsika i Kristy, ary mihezaka koa isika ahafantatra azy (Jo:10,14). « Hoatry ny fahafantaran'ny Raiko ahy sy ahafantarako ny Ray (Jo 10, 15) hoy i Jesoa ». Manana ny heviny ara-baiboly eto ny teny hoe : « mahafantatra » izay adika hoe : « mitia ». Ka raha milaza i Jesoa fa mahafantatra ny ondriny dia midika izany, fa tia ny ondriny hatramin'ny fahafoizana ny ainy Izy. Ohatra lehibe no anoharan'ny Jesoa an'izany : Toy ny fifankatiavan’Izy sy ny Ray. Ny Ray moa naneho fa tia azy, ary natsangany ho velona Izy. I Jesoa kosa nampiseho nandritry ny fiainany teto an-tany, fa tiany ny Ray, ka noraisiny ho toy ny sakafony mihintsy ny manatanteraka ny sitrapon'ny Ray.

Mihezaka koa ny Mpiandry Ondry tsara, mba « ananantsika ny fiainana ary ananantsika azy be dia be ». (Jo 10, 10). Nahatsapa an'izany ry Piera sy ireo Apostoly ka rafitra nilaza hoe : « Ankany amin'iza moa izahay ry Tompo; Ianao no manana ny teny mahavelona mandrakizay ».

Adidy mipetraka amintsika vita Batemy rehetra ny fiahiana ny fiantsoan'Andriamanbitra. Tokana ny antso miantefa amintsika mianakavy, ilay voalaza ao amin'ny Asan'ny Apostoly : « Omeko ny herin'ny Fanahy ianareo, ho vavolombeloko hatrany am-paravazan-tany » (Asa 1, 8). Izy Kristy no miantso antsika hanara-dia azy, dia i « Kristy Ilay làlana sy fahamarinana ary fiainana » (Jo 14, 16). Vahoaka marobe anefa no miraviravy tanana, miahaka toy ny ondry tsy misy mpiahy mitorovoka anaty fahoriana, miraparapa anaty haizina ary miandrandra izay hazavana entin'ny Vaovao Mahafalin'ny famonjena. Saingy mila famantarana izy ireo, mila vavolombelona koa, handresy lahatra azy mba hinoany. Atao ahoana tokoa moa no fino raha tsy misy mitory? Atao ahoana anefa no fitory raha tsy misy maniraka ? Izany indrinddra no nilazan'i Kristy hoe : « Maro ny vokatra fa ny mpijinja no vitsy, mangataha àry amin'ny tompom-bokatra mba hanirahany mpijinja ny vokany » ( Mt 5, 48). Isika kristianina vita batemy rehetra no iantefan'izany antso izany, dia isika izay nantsoin'Andriamanitra ho zanany, ka tonga mpisorona sady mpaminany ary mpanjaka.

Tsy nitsororika avy any an-danitra ny pretra sy ny relijiozy, na nitrebona avy amin'ny tany, fa nipoitra avy amin'ny fianakaviana kristianina. Ny fianakaviana no seminera voalohany anolokoloana ny toetra maha-olom-banona, fototra iorenan'ny fiainam-panahy kristianina, ka itsimohan'ny antson'Andriamanitra. Trotroina am-bavaka ianareo Ray aman-drenim-pianakaviana. Tolorana fisaorana koa, sy mbola ankaherezina noho ianareo, tsy mitandro hasasarana manao izay hahatonga taiza ny zanak'Andriamanitra, sady zanakareo koa, nankinina hovelominareo sy ho beazinareo, indrindra amin'izao vanin'andro sarotra, manozongozona ny herin'ny finoana sy ny fanantenana ary ny fitiavana narotsaka tao am-pontsika izao.

Kristy Ilay Mpiandry ondry tsara anie homba antsika mandrakariva.

Père RAHAVANA

DIMANCHE 25 AVRIL 2010 – MESSE DU 4^ème DIMANCHE DE PÂQUES

Année C – Couleur liturgique : BLANC

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

ÿ Regina caeli

Ry Mpanjakavavin’ny lanitra mifalia, Aleloia !

- Satria Ilay nentinao tany am-bohoka, Aleloia !

Dia efa nitsangan-ko velona araka ny teniny, Aleloia !

- Mivavaha amin’ Andriamanitra ho anay, Aleloia !

Mifalia sy miravoa, ry Maria Virjiny, Aleloia !

- Satria nitsangan-ko velona tokoa ny Tompo, Aleloia !

Aoka isika hivavaka

Ry Andriamanitra, Ianao nampientan-kafaliana an’izao tontolo izao tamin’ny nitsanganan’I Jesoa Kristy Zanakao Tomponay ; koa mihanta aminao izahay , enga anie noho ny vavak’I Maria Virjiny dia mba homenao anay ny fiainantsambatra mandrakizay . Amin’ny alalan’I Kristy Tomponay. Amen.

& VAKITENY MASINA VOALOHANY
Boky mitantara ny Asan’ny Apôstôly			Asa 13, 14. 43 – 52
Tamin’izany andro izany, i Paoly sy i Barnabe dia niala tany Perja, ka tonga tany Antiôkia any Pisidia ; ary niditra tao amin’ny Sinagôga izy tamin’ny andro sabata, ka nipetraka teo. Rehefa nirava ny Fiangonana, dia betsaka ny Jody sy ny prôzelita nanompo an’Andriamanitra, no nanaraka an’i Paoly sy i Barnabe, ary izy roa lahy kosa, niresaka tamin’izy ireo sy namporisika azy haharitra amin’ny fahasoavan’Andriamanitra. Tamin’ny sabata manaraka, dia saika tafangona nihaino ny Tenin’Andriamanitra avokoa ny tao an-tanàna rehetra. Fa feno fialonana ny Jody nony nahita izany vahoaka be izany, ka sady nanohitra ny teny nolazain’i Paoly no nanevateva azy. Tamin’izay i Paoly sy i Barnabe dia niteny tamin-kasahiana hoe : « Ianareo no tsy maintsy nitoriana ny Tenin’Andriamanitra voalohany indrindra, nefa noho ianareo mandà Azy sy manao ny tenanareo ho tsy mendrika ny fiainana mandrakizay, dia indro hankany amin’ny Jentily izahay. Fa toy izao no nandidian’ny Tompo anay : Efa natsangako ho fahazavan’ny Jentily ianao, mba hitondra famonjena hatramin’ny fara-vazan-tany ». Faly ny Jentily nony nandre izany ka nankalaza ny Tenin’ny Tompo, ary nino avokoa izay rehetra voalahatra ho amin’ny fiainana mandrakizay. Dia niely eran’izany tany izany ny Tenin’ny Tompo. Nefa notarihan’ny Jody ny vehivavy tia vavaka sy ambony toetra, mbamin’ny loholona tao an-tanàna, ka nampanenjika an’i Paoly sy i Barnabe, sy nandroaka azy hiala amin’ny taniny. Tamin’izay, izy roa lahy nanintsana ny vovoka tamin’ny tongony hiampanga an’ireo, dia lasa nankany Ikôniôma ; ary ny mpianatra kosa, feno hafaliana sy Fanahy Masina.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA FAHAROA
Boky Fanambaràna nosoratan’I Md Joany			Apôk. 7, 9. 14b – 17
Izaho, Joany, nahita vahoaka be tsy azon’olona isaina, avy amin’ny firenena rehetra, sy ny fokom-pirenena ary ny fanjakana mbamin’ny samihafa fiteny rehetra, nitsanagana teo anoloan’ny seza fiandrianana sy ny Zanak’ondry, miakanjo fotsy sy mitana sampan-drofia. Ary hoy ny iray tamin’ireo Anti-dahy tamiko : « Ireo no avy tamin’ny fampijaliana lehibe, nanasa sy nampadio ny akanjony tamin’ny Ran’ny Zanak’ondry. Koa indreo izy eo anoloan’ny seza fiandrianan’Andriamanitra, manompo Azy andro aman’alina ao an-Tempoliny, ary hamponenin’Ilay mipetraka eo amin’ny seza fiandrianana ao an-tranony. Tsy ho noana na hangetaheta intsony ireo, ary tsy hampaninona azy na hainandro na zava-mandoro hafa. Fa ny Zanak’ondry, Izay mipetraka eo afovoan’ny seza fiandrianana, no ho Mpiandry azy, sy hitondra azy amin’ny loharanon’aina, ary Andriamanitra no hamaoka ny ranomaso rehetra amin’ny masony ».
Izany àry ny Tenin’ny Tompo	-	Hisaorana anie Andriamanitra !

& EVANJELY MASINA
Evanjely masina nosoratan’i Md Joany			Jo. 10, 27 - 30
Tamin’izany andro izany I Jesoa niteny tamin’ny vahoaka Jody nanao hoe : « Izaho no Mpiandry ondry tsara ». Ary dia niteny koa Izy nanao hoe : « Ny ondriko mihaino ny feoko, Izaho mahalala azy, ary izy manaraka Ahy, omeko ny fiainana mandrakizay izy, ka tsy ho very na oviana na oviana, ary tsy hisy haharombaka azy eo an-tanako. Ny Raiko Izay nanome an’ireo dia lehibe noho izao rehetra izao, ka tsy misy maharomboka, eo an-tanan’ny Ray. Izaho sy ny Ray dia iray ihany ».
Izany àry ny Tenin’ny Tompo	-	Dera anie ho Anao, ry Kristy !

( fifampizarana

Mankalaza ny Fetin'ny Mpiandry ondry tsara isika androany. Ny Mpiandry ondry tsara dia i Jesoa Kristy ary isika no ondry andrasany, tsy misy tiany ho very na dia iray aza ka izany no mahatonga Azy tsy mitsahatra manangona antsika ho ao anaty vala iray. Ankehitriny dia manana mpiandry ondry tsara isika izay manohy ny asan'i Kristy dia ny Papa, ny Eveka, ny Pretra ary ireo Relijiozy isan-tsokajiny. Izany indrindra no mahatonga azy ireo androany tafavory eto mba hiara-mivavaka sy hifaly amintsika satria azo lazaina fa fetin'izy ireo androany.

Tiana marihina anefa fa mila fanohanana ara-bavaka izy ireny satria sarotra ny lalana hizorana. Mifampivavaka isika mba ho tena mpiandry ondry mahatoky, mendrika sady masina izy ireny ary mba hisy antso miantefa koa any amin'ny fianakaviana tsirairay avy any ka hampitombo ny mpindry ondry eto anivontsika Malagasy ka izay indrindra no mahatonga anay hitalao hoe :

Tompo ô, nantsoinao aho, teo anivon'ny Fiaraha-monina

Tompo ô, inty aho hamehy tena, inty aho hampiely ny hafatrao

amin'ireo madinika na dia tsy mendrika aza.

Manomboka androany, indro asehoko etoana

Ny voady, eny tsy hivadika aminao

Eny ry Tompo ô, maro ireo vato misakana

Koa tohano re ry Tompo ô, sao rendrika

Tompo ô ô ô, ampianaro mivavaka izahay e

Tahaka ny nataon'i Joany e e e

Ampianaro mivavaka izahay e

Tahaka ny nataon'i Joany e

Ry Rainay any an-danitra ô ô ô, ho hamasinina anie ny Anaranao …

Sr Olga Haingonirina

Avy amin’ny Pretra sy ny Relijiozy Malagasy

¦ soritr’asa manaraka SY VAOVAO SAMIHAFA
1.	TAKARIVA MENAMASOANDRO, 24 AVRILY 2010 : Misaotra an’Andriamanitra isika mianakavy fa tontosa soa aman-tsara ny fetim-pianakaviana izay nataontsika omaly : “Takariva menamasoandro”. Nahafinaritra ny firaisan-kina sy fafoizan-tena ary fahalalan-tanana nasehontsika rehetra teto amin’ny FKMP. Andriamanitra anie hamaly ny soa vitantsika ho an’ny Fiangonana e.
2.	FRAT 2010 : Tamin’ny Alarobia 21 avrily ihany koa no nanainga ireo tanora 10 mianadahy : Anja, Diana, Faly, Faly Rasolojaona, Hasina, Hasina Ravelomanda, Léa, Maminiaina, Tojo ary Typhanie izay misolontena ny FKMP, handray anjara amin’ny FRAT 2010 any Lourdes. Fivahiniana Masina ataon’ireo tanora 15 – 17 taona eto amin’ny Diosezy valo eto amin’ny Région Apôstôlika Ile de France ny FRAT (avy amin’ny Fraternel), miaraka amin’ny Eveka. « Tompo ô, ampianaro mivavaka izahay », izay lohahevitra hifampizaran’ireo tanora rehetra ireo. Mifarana ny Alatsinainy 26 avrily. Trotroy am-bavaka izany fotoana izany.
3.	FIOMANANA AMIN’NY SAKRAMENTA : Misy ihany koa ireo fiomanana amin’ny Sakramenta eto amin’ny Fiangonantsika : Batemy, Komonio Voalohany, Konfirmasio, Mariazy. Androany Alahady 25 Avrily dia i Kaliana VANDERWALLE no handray ny Sakramentan’ny Batemy. Ary miarahaba azy isika mianakavy. Ary mbola hisy koa ireo zaza handray izany Sakramentan’ny Batemy izany ny Alahady 08 May fa mbola manohy ny fiofanana. Ka ento am-bavaka mba ho be ny mpijinja
4.	ALAHADY VOALOHAN’NY VOLANA, 02 MAI 2010 : Ny alahady voalohan’ny volana dia natokana ho an’ny Vaomieran’ny KOLON-TSAINA. Izy ireo no mampita ny kolontsaina malagasy, mampianatra ny teny malagasy an’ireo zanatsika.
5.	ZAIKA BE ANY “PARAY – LE – MONIAL”, 22 – 23 – 24 MAY 2010 : Tsy ela dia handeha hanao dia rodobe any Paray-Le-Monial isika mianakavy eto amin’ny FKMP. Fihaonantsika Malagasy Katolika rehetra aty Frantsa io. Misy ny fifampizarana, misy ny fiaraha-mivavaka. Ao koa ny fampianarana ara-pinoana sy ny fialam- Boly. Koa hisy fotoana iray hanomanantsika miaraka an’izany fotoan-dehibe izany.

” FIZARANA ANDRAIKITRA
1.	MANENTANA LITORIZIA : 02/05/2010 : VAOMIERAN’NY FIFANDRAISANA (Alahady faha-5 fankalazana ny PAKA)
2.	MANADIO FIANGONANA : 01/05/2010 : VAOMIERAN’NY FIARAHA-MONINA