“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 04 Avrily 2010	N° 57
ALAHADY PAKA – TAONA D

Fiekem-pinona ataon’izy mianadahy

Profession de Foi

Amin’ny Alin’ny PAKA

- ANDRIAMANANTENA Lisy Nadia

- RAKOTOMANANTSOA Andrianome

DIMANCHE 04 AVRIL 2010 – MESSE DU JOUR DE PÂQUES

Année C – Couleur liturgique : BLANC

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

ÿ Regina caeli

Ry Mpanjakavavin’ny lanitra mifalia, Aleloia !

- Satria Ilay nentinao tany am-bohoka, Aleloia !

Dia efa nitsangan-ko velona araka ny teniny, Aleloia !

- Mivavaha amin’ Andriamanitra ho anay, Aleloia !

Mifalia sy miravao, ry Maria Virjiny, Aleloia !

- Satria nitsangan-ko velona tokoa ny Tompo, Aleloia !

Aoka isika hivavaka

Ry Andriamanitra, Ianao nampientan-kafaliana an’izao tontolo izao tamin’ny nitsanganan’I Jesoa Kristy Zanakao Tomponay ; koa mihanta aminao izahay , enga anie noho ny vavak’I Maria Virjiny dia mba homenao anay ny fiainantsambatra mandrakizay. Amin’ny alalan’I Kristy Tomponay. Amen.

& VAKITENY MASINA VOALOHANY
Boky mitantara ny Asan’ny Apôstôly			Asa. 10, 34a. 37 – 43
Nony tonga tany Sezarea I Piera tao an-tranon’I Kôrnely, dia niloa-bava hoe : “Fantatrareo ny zavatra tanteraka eran’I Jodea manontolo, nanomboka tany Galilea taorian’ny Batemy notorîn’I Joany : dia ny amin’I Jesoa avy any Nazareta, izay nohosoran’Andriamanitra tamin’ny Fanahy Masina sy ny heriny, ka nandeha nanao soa hatraiza hatraiza, nahasitrana izay rehetra azon’ny demony, satria nomba Azy Andriamanitra. Ary izahay no vavolombelon’ny zavatra rehetra nataony tany amin’ny tanin’ny Jody sy tany Jerosalema. Dia novonoiny Izy, nahantony tamin’ny hazo ; nefa natsangan’Andriamanitra kosa Izy tamin’ny andro fahatelo, sady nasehony miharihary, tsy tamin’ny olona rehetra, fa tamin’ny vavolombelona efa voatendrin’Andriamanitra rahateo, dia taminay, izay efa niara-nihinana sy nisotro taminy, rahefa nitsangan-ko velona Izy. Izy nandidy anay hitory amin’ny vahoaka sy hanambara fa Izy no voatendrin’Andriamanitra ho Mpitsara ny velona sy ny maty. Ny mpaminany rehetra koa manambara fa amin’ny Anarany no ahazoan’izay mino Azy famelan-keloka.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA FAHAROA
Taratasin’I Md Paoly Apôstôly ho an’ny Kristianina tany Kôlôsy			Kôl. 3, 1 – 4
Ry Kristianina havana, raha niara-nitsangana tamin’i Kristy ianareo, dia ny zavatra any ambony amin’izay itoeran’i Kristy eo an-kavanana’Andriamanitra no katsaho : ny zavatra any ambony no ankafizo, fa aza ny zavatry ny tany. Fa maty ianareo, ary miara-miafina amin’I Kristy ao amin’Andriamanitra ny fiainanareo ; fa rahefa hiseho I Kristy izay fiainantsika, vao hiara-miseho Aminy amim-boninahitra kosa ianareo.
Izany àry ny Tenin’ny Tompo	-	Hisaorana anie Andriamanitra !

& EVANJELY MASINA
Evanjely masina nosoratan’i Md Joany			Jo. 20, 1 – 9
Tamin’ny andro voalohan’ny herinandro, dia lasa maraina koa mbola maizina nankany amin’ny fasana I Madelenina, ka nahita fa voaesotra tamin’ny fasana ny vato. Dia lasa izy nihazakazaka nankany amin’I Simôna Piera sy ilay mpianatra malalan’I Jesoa, ka nanao tamin’ireo hoe : “Nalain’olona tao am-pasana ny Tompo, ka tsy fantatray izay nametrahany Azy”. Dia mba lasa koa i Piera sy ilay mpianatra anankiray nankany amin’ny fasana, ka niara-nihazakazaka izy roa lahy, saingy nandeha faingampaingana kokoa ilay mpianatra anankiray ka tonga talohan’i Piera tao amin’ny fasana. Dia niondrika izy ka nahita ny lamba nipetraka teo, nefa tsy niditra . Nony tonga kosa i Piera nanarakaraka azy, dia niditra tao am-pasana ka nahita ny lamba nipetraka teo, sy ny lamba nasarona ny lohany, tsy niara-nipetraka tamin’ny lamba fa nivalona nitokana tery. Dia niditra koa ilay mpianatra izay tonga taloha teo amin’ny fasana, ary nahita ka nino. Fa tsy mbola fantatr’izy ireo ny Soratra Masina milaza fa tsy maintsy hitsangan-ko velona I Jesoa.
Izany àry ny Tenin’ny Tompo	-	Dera anie ho Anao, ry Kristy !

MIFALIA FA VELONA NY TOMPO, ALELOIA!

Herinandro be izao no niarahatsika tamin’i Jesoa, nitaitaina, nandinika ny fijaliana sy ny fahafatesany. Iza moa no hanamafy fo ka tsy hangoraka sy tsy handon-tratra raha i Jesoa Ilay marina no napiharan’ny olombelona ny haratsiam-panahiny !

Andro vitsivitsy taorian’izany anefa dia niely eran’ny Jerosalema ny vaovao, tsaho raha ny marimarina kokoa fa hoe: “nitsangana ho velona hono Ilay nofantsihana teo amin’ny Hazo fijaliana”. Vaovao Mahafaly, fa saingy ho an’ny maro toa sarotra inoana. Tsy misy olona afa-milaza ho nanatrika izany fotoana izany. Fasana efa nisokatra sy foana no hany nisy nahita. Tsy mahagaga raha maro no tsy mino ny fitsanganan-ko velona, eny fa na ny Kristianina aza. Satria na ireo Apostoly ihany koa dia tsy niaiky fa nitsangana ho velona ny Tompo, raha tsy efa fotoana maro taty aoriana. “Nisy nangalatra ny fatin’ny Tompo, ka tsy fantatray izay nasiany Azy”. Izany no fihevitr’i Maria Madelena. Asan’ny Herin’Andriamanitra ny fitsanganan-ko velona ka tsy azon’ny saina vinavinaina.

Tsy misy dikany anefa ny fanambaran’ny Evanjely raha toa ka tsy nitsangana ho velona tokoa i Jesoa: “Raha tsy nitsangan-ko velona i Jesoa dia tsy misy dikany ny toriteninay ary tsy misy fotony ny finoana…” (1 Kor. 15,14).

Ilay Mpianatra nihazakazaka ka tonga voalohany tany amin’ny fasana no nilaza fa “nahita ka nino” Fa inona no hitany ? Ireo lamba namonosana an’i Jesoa nivalona teo amin’ilay toerana nisy ny faty. Toa midika fa tsy nangalarin’olona ny fatin’i Jesoa. Ny mpangalatra manko, noho ny fahamehana tsy hanam-potoana mihintsy no tsy hanan-kevitra velively hamalona ireo lamba ireo.

Nahita ilay Mpianatra vao nino. Isika kosa, hoy i Jesoa dia “Sambatra, satria tsy nahita nefa mino” (Jn. 20, 29). Izany tenin’i Jesoa izany no mamelombelona ny fanantenantsika ka mahatonga antsika ho faly ankehitriny. Miharihary manko ny fahalavorarian’ny famonjena vokatrin’ny fitiavan’Andriamanitra ny olombelona, izay efa notanterahan’i Jesoa teo amin’ny Hazofijaliana. Faly satria santatry ny fitsanganantsika ho velona ihany koa ny fahaveloman’i Kristy. Tsy tapitra eto amin’ity tany ity ny fiainantsika, fa amin’ny alalan’i Jesoa nandresy ny fahafatesana dia antsoin’Izy Ray isika hiombona aina aminy. Izy Ilay efa nanangana antsika ho zanany tamin’ny Batemy. Amin’ny alalan’ireo Sakramenta dia velona mandrakizay ao amin’ny Fiangonana, ao amin’ny Kristianina tsirairay i Kristy. Maniraka azy ireo hiaina sy hizara izany fahavelomana izany, mba tsy ho azy irery ny hafaliana sy ny fanantenana entin’i Kristy tafatsangan-ko velona fa ho an’ny olombelona rehetra.

P. Richard RAHASASON, Aumônier par intérim

¦ soritr’asa manaraka SY VAOVAO SAMIHAFA
1.	TAKARIVA MENAMASOANDRO, 24 AVRILY 2010 : Izany no lohateny hanentanan’ny koranam-pianakaviana hataon’ny Fiangonantsika amin’ny Asabotsy 24 Avrily 2010, manomboka amin’ny 7 ora hariva ao amin’ny Crypte-ny Fiangonana Saint Domonique 16, rue de la Tombe-Issoire Paris 14ème. Métro : Saint-Jacques (Ligne N° 6) RER B : Denfert-Rochereau Ny Vidim-pidirana : Ø Mihoatra ny 12 taona : 10 € Ø 6 – 12 taona : 5 € Ø Latsaky ny 6 taona : maimaim-poana Ny fianarana ny fety dia efa nanomboka tamin’ny Zoma lasa teo, ary mamporisika antsika rehetra hanatevina izany sy hividy ary hivarotra billets. Ny vola rehetra azo amin’izany dia hanampiana manontolo ny fandehanana any amin’ny Zaikabe any “Pary-Le-Monial”.
2.	FIANARANA KATESIZY : Mitohy koa ny fampianarana katesizy sy ny fandalinam-pinoana eto amin’ny Fiangonantsika isan’alahady. Manomboka amin’ny 2 ora sy sasany tolak’andro.
3.	ZAIKA BE ANY “PARAY – LE – MONIAL”, 22 – 23 – 24 MAY 2010 : Misokatra androany ny fisoratana anarana ho an’ny amin’ny Zaikabe any Paray-Le-Monial, ny 22 – 23 – 24 May 2010 izao. Misy ny takila manazava ny momba ny Zaikabe sy taratasy fisoratana ho fenointsika izay handeha. Fandraisana anjara amin’ny saram-pilasiana sy fitaterana : Ø Mihoatra ny 12 taona : 40 € (arrhe : 20 €) Ø 5 – 12 taona : 20 € (arrhe : 10 €) Ø Latsaky ny 5 taona : maimaim-poana Mifarana ny Alahady 11 Avrily 2010 ny fisoratana anarana

” FIZARANA ANDRAIKITRA
1.	MANENTANA LITORIZIA : 11/04/2010 : VAOMIERAN’NY TANORA (Alahady faha-2 PAKA)
2.	MANADIO FIANGONANA : 10/04/2010 : VAOMIERAN’NY FITANTANANA