“Mifankatiava ianareo tahaka ny nitiavako anareo”

( Joany 15, 12 )

Fiangonana Katolika Malagasy Paris sy Ile-de-France

171 Boulevard Brune – 75 014 PARIS

Site : http://www.fkmp.org/

 

 

H ISAN-TOKANTRANO

 

Alahady 28  Marsa 2010

N° 56

 

ALAHADY SAMPANKAZO – TAONA D

 

Mankalaza ny fiakaran’I Jesoa an-tsitrapo tany Jerosalema isika.

 

Ny fidirany ao Jerosalema dia maneho ny fahatongavan’ny Fanjakan’Andriamanitra tanterahin’ ny Mesia Mpanjaka amin’ny alalan’ny fahafatesany sy ny fitsanganan-ko velony.

 

  1. Ny Nidiran’I Kristy tao Jerosalema
  2. Ny Nidiran’I Kristy tao an-Tempoly
  3. Ny Fandinihana ny Nijalian’I Jesoa Kristy
  4. Sorom-pisaorana

 

fahatsiarovana

ny nidiran’ny tompo

tao

jerosalema

 
 

 

“Nony ampitso, dia ren’ny vahoaka be izay tonga hanao ny fety fa ho avy ao Jerosalema I Jesoa. Ka naka sampan-drofia izy, dia nitsena Azy sy niantso hoe : Hôzàna, hosoavina anie Ilay avy, amin’ny anaran’ny Tompo, sy Mpanjakan’I Israely”.

 

Md. Joany 12, 12 – 13

 

 

DIMANCHE 28 MARS 2010 – MESSE DES RAMEAUX ET DE LA PASSION

Année C – Couleur liturgique : VIOLET

 

Jean-Marie VIANNEY

1786 – 1859

 

TAONAN’NY PRETRA

 ANNEE SACERDOTALE

Du 19 Juin 2009 au 19 Juin 2010

 

Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy  ankanavaka izy.

 

& evanjely masina
(ny nidiran’ny tompo tao jerosalema)

 

Evanjely Masina nosoratan’i Md. Lioka

Lk. 19, 28 – 40

Indray andro, dia nandeha hiakatra any Jerosalema I Jesoa, fa nony mby akaiky an’I Betifage sy Betania anilan’ny tendrombohitra Oliva Izy, dia naniraka ny mpianany roalahy, nanao hoe : “Mankanesa amin’itsy vohitra aloha itsy, fa rahefa miditra ao ianareo dia hahita zanak’ampondra mifatotra tsy mbola nitaingenan’olona, ka vahao izy dia ento aty. Ary raha misy manontany anareo hoe : “Nahoana io no vahanareo ?” Valio hoe : “Misy ilan’ny Tompo azy ?”. Dia lasa ireo iraka ka nahita ny zavatra araka ny voalazan’I Jesoa taminy. Teo am-pamahana ny zanak’ampondra, dia hoy ny tompony tamin’izy ireo : “Nahoana no vahanareo ity zanak’ampondra ?” Ka novaliany hoe : “Misy ilan’ny Tompo azy”. Dia nentiny tany amin’I Jesoa ny zanak’ampondra, dia nataony teo amboniny ny fitafiany, dia natainginy teo I Jesoa. Nony nandroso Izy, dia novelaran’ny olona ny fitafiany ny lalana. Ary rehefa mby akaikin’ny fidinana amin’ny tendrombohitra Oliva Izy, dia nientan-kafaliana ny mpianany maro be ka nankalaza an’Andriamanitra tamin’ny feo mahery, noho ny fahagagana rehetra hitany, ka hoy izy ireo : “Hankalazaina anie Mpanjaka avy amin’ny anaran’ny Tompo ! Fiadanana anie any an-danitra, ary voninahitra anie any amin’ny avo indrindra !”

Ary ny Farisianina sasany izay teo amin’ny vahoaka nanao taminy hoe : “Ry Mpampianatra ô, rarao re ny mpianatrao !”. Fa novaliany hoe : “Lazaiko aminareo fa raha mangina ireo, dia hiantsoantso  ny vato”.

Izany àry ny Tenin’ny Tompo

-

Dera anie ho Anao, ry Kristy !

 

& VAKITENY MASINA Voalohany

 

Bokin’i Izaia Mpaminany

Iz. 50, 4 – 7

Nomen’ny Tompo Andriamanitra ny lelan’ny mpianatra aho mba hahaizako mankahery ny reraka, amin’ny teniko. Mamoha isa-maraina Izy ; mamoha ny sofiko Izy, mba hihainoako, ohatra ny fihainoan’ny mpianatra. Nosokafan’ny Tompo Andriamanitra ny sofiko, ary tsy mba nanohitra aho, na nihemotra akory. Natolotro tamin’ny mpikapoka ahy ny lamosiko ary tamin’ireo nanongotra ny volombavako, ny takolako ; ary ny tavako tsy nafeniko tamin’ny latsa sy ny rora. Fa ny Tompo Andriamanitra namonjy Ahy, ka ny latsa tsy nahaketraka Ahy ; ka ny tavako nataoko manahaka ny afo vato, ary fantatro fa tsy ho menatra Aho.

Izany àry ny Tenin’ny Tompo

-

Hisaorana anie Andriamanitra !

 

& VAKITENY MASINA faharoa

 

Taratasin’i Md. Paoly Apôstôly ho an’ny Kristianina tany Filipy

Fil. 2, 6 – 11

Na dia tao amin’ny fomban’Andriamanitra aza Izy, ka tsy nihevitra ny fitoviany saranga amin’Andriamanitra ho zavatra nobaboiny, fa nialany izany tamin’Izy naka ny fomban’ny mpanompo, ka tonga mitovy amin’ny olombelona, sy hita ho olombelona tamin’ny fisehoany rehetra, ary nilatsa-tenany ho ambany, ary nanolo-tena hanaiky hatramin’ny fahafatesana, dia fahafatesana tamin’ny Hazofijaliana. Ho valin’izany kosa, dia nasandratr’Andriamanitra ambony indrindra Izy, sy nomeny Anarana mihoatra ny anarana rehetra, mba handohalika amin’ny Anaran’I Jesoa avokoa ny lohalika rehetra, na any any an-danitra, na ny ety an-tany, na ny any ambany, ary mba hanaiky avokoa ny lela rehetra fa I Jesoa Kristy dia Tompo efa niditra any amin’ny voninahitr’Andriamanitra Ray.

Izany àry ny Tenin’ny  Tompo

-

Hisaorana anie Andriamanitra !

 

 

"… RAHA MANGINA IREO, DIA NY VATO INDRAY NO HIANTSOANTSO."

(Lioka 19, 40)

 

Nidera sy nankalaza an’Andriamanitra ny vahoaka rehetra. Niantsoantso sy nihira noho ny hafaliana, satria i Jesoa ilay befitiavana, nanao soa tamin’izay tanàna rehetra nolalovany, no indro tonga ao an-tanànan’ i Jerosalema. Ho an’ireo vahoaka maro ireo, i Jesoa no loharanon’ny fiadanana sy ny fahasoavana. Marina tokoa izany !

Nefa, toa mifono hevitra hafa ny antsoantson’izy ireo: “Hombam-pitahiana amin’ny anaran’ny Tompo anie ilay Mpanjaka vao avy !” I Jesoa no ilay Mesia, indro fa miakatra ny renivohitra, vonona handray fahefana sy hampiorina ny fanjakany.

“Tsy azo ekena izany!” hoy ireo Farisianina. Ahoana no hinoana fa i Jesoa ilay olombelona toa azy, ilay zanak’i Jozefa mpandrafitra (Mt 13, 55-57) no lazaina fa Mesia hanjaka ao an’tanànan’i Jerosalema renivohitr’Andriamanitra Avo indrindra ! “Mihevi-tena hitovy amin’Andriamanitra angaha ilay io ?” (Jn 10, 33). Fanaovana tsinontsinona an’Andriamanitra izany. Indrindra koa moa raha tsy sahy miteny sy mampangina ireo vahoaka miantsoantso ireo izy.

Sarotra hodian-tsy hita ny fisian’i Jesoa eo anivontsika. Ny fidirany tao Jerosalema dia midika zava-dehibe, tsy ho an’ireo vahoaka Israely ireo ihany fa ho an’izao tontolo izao mihintsy : Ilay Mpahary no indro tonga eo anivontsika, naka endrika voahary mba hamerina indray ny voahary rehetra amin’ilay haja nahariana azy hatrany am-boalohany. “Mitovy endrika amin’Andriamanitra” (Jen 1, 26). Koa rariny noho izany raha mientan-kafaliana ny voahary rehetra, satria Ilay Mpahary no indro tonga mamangy azy.

Iza moa no efa nahita na nahare vato niteny ?. Toy ny voahary hafa rehetra dia moana ka tsy afaka hiantsoantso na oviana na oviana izy ireny. Nahoana ary no ilazan’i Jesoa fa “raha mangina ireo vahoaka ireo, dia ny vato indray no hiantsoantso”? Niangaram-pitiavana isika olombelona fa noharian’Andriamanitra mitovy endrika aminy: “manam-peo, afaka mamboraka izay ao am-po”. Iangavian’i Jesoa ary isika, mba hanohitra ny fanakasakanana rehetra ka ho afaka hampiasa ny “feo” hanambarana sy hiderana ary hankalazana Ilay Mpahary Mpanjakan’izao tontolo izao.

 

P. Richard RAHASASON, Aumônier par intérim

 

¦ soritr’asa manaraka SY VAOVAO SAMIHAFA

1.

TAKARIVA MENAMASOANDRO,

24 AVRILY 2010 :

Izany no lohateny hanentanan’ny koranam-pianakaviana hataon’ny Fiangonantsika amin’ny Asabotsy 24 Avrily 2010, manomboka amin’ny 7 ora hariva ao amin’ny Crypte-ny Fiangonana Saint Domonique  16, rue de la Tombe-Issoire Paris 14ème.

 

Métro : Saint-Jacques  (Ligne N° 6)

RER B : Denfert-Rochereau

 

Ny Vidim-pidirana :

Ø    Mihoatra ny  12 taona : 10 €

Ø    6 – 12 taona : 5 €

Ø    Latsaky ny 6 taona : maimaim-poana

 

Ny fianarana ny fety dia efa nanomboka tamin’ny Zoma lasa teo, ary mamporisika antsika rehetra hanatevina izany sy hividy ary hivarotra billets. Ny vola rehetra azo amin’izany dia hanampiana manontolo ny fandehanana any amin’ny Zaikabe any “Pary-Le-Monial”.

 

2.

FIANARANA KATESIZY :

Mitohy koa ny fampianarana katesizy sy ny fandalinam-pinoana eto amin’ny Fiangonantsika isan’alahady. Manomboka amin’ny 2 ora sy sasany tolak’andro.

3.

ZAIKA BE ANY “PARAY – LE – MONIAL”,

22 – 23 – 24 MAY 2010 :

Misokatra androany ny fisoratana anarana ho an’ny amin’ny Zaikabe any Paray-Le-Monial, ny 22 – 23 – 24 May 2010 izao. Misy ny takila manazava ny momba ny Zaikabe sy taratasy fisoratana ho fenointsika izay handeha.

Fandraisana anjara amin’ny saram-pilasiana sy fitaterana :

Ø    Mihoatra ny 12 taona : 40 €
(arrhe : 20 €)

Ø    5 – 12 taona : 20 € (arrhe : 10 €)

Ø    Latsaky ny 5 taona : maimaim-poana

Mifarana ny Alahady 11 Avrily  2010 ny fisoratana anarana

 

 

” FIZARANA ANDRAIKITRA

 

1.

MANENTANA LITORIZIA :

04/04/2010 : ANTOKO MPIHIRA “Feon’Ajomara”

(Alahady PAKA)

 

2.

MANADIO FIANGONANA :

03/04/2010 : VAOMIERAN’NY TANORA

 

 

“Mifankatiava ianareo tahaka ny nitiavako anareo”

( Joany 15, 12 )

Fiangonana Katolika Malagasy Paris sy Ile-de-France

171 Boulevard Brune – 75 014 PARIS

Site : http://www.fkmp.org/

 

H ISAN-TOKANTRANO

 

FANKALAZANA NY HERINANDRO MASINA

 

 

Manomboka ny Alahady Sampankazo ary mifarana ny Asabotsy Masina

 

 

Alahady Sampankazo

–

28 Marsa 2010

Alakamisy Masina

–

1 Avrily 2010

Zoma Masina

–

2 Avrily 2010

Sabotsy Masina

–

3 Avrily 2010

 

 

 

 

 

 

 

 

 

 

 

 

 

“Fa ny Zanak’olona tsy tonga mba hotompoina, fa mba hanompo ary hahafoy ny ainy ho fanavotana ny maro”

Md. Marka 10, 45

ALAKAMISY MASINA

 

Fankalazana ny namoronan’I Jesoa ny Sakramentan’ny EOKARISTIA, taorian’ny Sakafo farany niarahany tamin’ny mpianany.

Ny fanetren-tena lehibe nasehon’ny Tompo tamin’ny nanasany ny tongotry ny mpianany.

 

Avoitrany indrindra koa ny dinidinika ambany tafon-trano momba ny tokony HIFANKATIAVANA, ary ny hafatrafatra farany.

 

  1. Fanasan’ny Tompo

- Fanomanana ny Fanasan’ny Tompo

- Fankalazana ny Fanasan’ny Tompo

- Fanasan-tongotra

  1. Sorom-pisaorana
  2. Fiaretan-tory Masina (Getsemania)

 

 

“Dia tonga ny andron’ny Azima izay tsy maintsy hamonoana ny zanak’ondrin’ny Paka, ka naniraka an’I Piera sy I Joany I Jesoa nanao hoe : “mandehana manamboatra ny Paka hohanintsika”.

Md Lioka 22, 7 – 8

 

 

“Ka raha Izaho Tompo sy Mpampianatra aza nanasa ny tongotrareo, ianareo samy ianareo koa dia tsy maintsy mifanasa tongotra”.

 

Md Joany 13, 14

 

 

01/04/2010

18h00 (Film : « La passion du Christ »)

 

19h30 (Lamesa)

Toerana :

Chapelle Saint Paul

171 boulevard Brune – 75014 PARIS

 

Manentana :

§       Vaomieran’ny KOLONTSAINA

§       Vaomieran’ny FIARAHA-MONINA

 

 

ZOMA MASINA

 

Fankalazana ny Fijalian’ny Tompo. Fanatrehana sy fibanjinana an’I Kristy nijaly sy maty, no fihobiana ny Hazofijaliana namonjen’I Kristy antsika.

 

Namonjy antsika ny fahafatesany sady nandreseny ny fahafatesantsika olombelona.

 

  1. Fitantarana ny Nijalian’I Kristy

- Ranombavaka lehibe sy manetriketrika

  1. Fankalazana ny Hazofijaliana

- Tsodrano amin’ny alalan’ny Hazofijaliana

- Fanehoam-pitiavana an’I Kristy

  1. Fandraisana ny Tenan’I Kristy
  2. Ny nandevenana an’I Kristy

 

 

 

“Vao nanandrana ny vinaingitra Izy dia nanao hoe : “Tanteraka ny zavatra rehetra. Dia nanondrika ny lohany Izy ka niala aina””.

Md Joany 19, 30

 

 

 

02/04/2010

18h30 (Lalan’ny hazofijaliana)

 

19h30

Toerana :

Chapelle Saint Paul

171 boulevard Brune – 75014 PARIS

 

Manentana :

§       Vaomieran’ny FIFANDRAISANA

§       Vaomieran’ny FITANTANANA

 

 

SABOTSY MASINA

« ALINA FANKALAZANA NY PAKA »

Alina Masina, fiaretan-tory ankalazana amin’ny fomba manetriketrika ny Fitsanganan’ny Tompo ho velona

 

  1. I Kristy Fahazavana
  2. I Kristy Tenin’Andriamanitra
  3. I Kristy Loharanon’aina
  4. I Kristy Mofon’aina

 

“Ka novenjen’ny Tompo ho afaka tamin’ny tanan’ny Ejipsianina I Israely tamin’izany andro izany”

Eksaody 14, 30

 

“Nahoana no aty amin’ny maty no itadiavanareo izay velona ? Tsy eto Izy fa efa nitsangana ; tsarovy ny teny nolazainy taminareo fony Izy mbola tany Galilea”.

Md Lioka 24, 5 – 6

 

 

03/04/2010

20h00 (Lamesa)

Toerana :

Chapelle Saint Paul

171 boulevard Brune – 75014 PARIS

 

Manentana :

§       Vaomieran’ny FINOANA

§       Vaomieran’ny TANORA

 

ALAHADY PAKA

« NITSANGAN-KO VELONA TOKOA I JESOA »

 

Fety lehibe indrindra ao amin’ny Fiangonana, ankalazana an’I Jesoa nitondra fahafahana, nandresy ny fahafatesana, nitsangan-ko velona.

 

“Raha tsy misy ny fitsanganan’ny maty, na dia I Kristy aza tsy nitsangana avy amin’ny maty ; Ary raha tsy nitsangana avy amin’ny maty I Kristy, dia foana ny toriteninay, foana koa ny finoanareo !”.

1Kôr. 15, 13 – 14

04/04/2010

15h00 (Lamesa)

Toerana :

Chapelle Saint Paul

171 boulevard Brune – 75014 PARIS

 

Manentana :

§       ANTOKO MPIHIRA “Feon’Anjomara”