“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 21 Marsa 2010	N° 55
ALAHADY FAHADIMY AMIN’NY KAREMY – TAONA D
Samy mpanota ka tokony hifamela Tsy sasatra ny manenjika an’i Jesoa ny Farisianina sy ny Mpanora-dalàna. Mitady izao fomba rehetra izao izy ireo mba hiampangana an’i Jesoa. Koa satria mpahay lalàna moa ireo antokon’olona ireo dia resaka lalàna ihany no amelezany sy hamandrihany an’i Jesoa. Toy ny hoe : tsy tokony hanasitrana amin’ny andro Sabata satria voararan’ny lalàna kanefa i Jesoa manasitrana olona amin’ny andro Sabata.Vokany : nohelohiny ho faty i Jesoa. Anio dia miodina amin’ ity vehivavy tratra nijangajanga ity indray : anontanian’izy ireo Jesoa raha manaiky ny lalàn’i Moizy ka hamela ny olona hitora-bato an’ilay vehivavy tratra nijangajanga na tsy hanaiky ka hisakana ny olona tsy hitora-bato, nefa amin’izay fotoana izay dia ho hampangainy ho toy ny olona tsy manaja lalàna Izy. Ny valintenin’i Jesoa dia hoe : « Izay tsy manam-pahotana aminareo no aoka hitora-bato azy voalohany ». Tsy mandrava ny lalàna misy i Jesoa. « Tsy tonga handrava ny lalàna aho hoy izy fa tonga hanatanteraka ». Fantatr’i Jesoa tsara fa tsy afaka miaina amin’ny tany tsy misy lalàna ny olombelona. Raha tiana ny hisian’ny fiainana mirindra sy vanona eo amin’ny fiarahamonina iray dia tsy maintsy misy ny lalàna mifehy sy hiaraha-manaja. Saingy tsy tiany ny lalàna mangeja ny olona. Tokony hanafaka ny lalàna fa tsy hamatotra. Natao hanampy ny olona hivelatra ny lalàna fa tsy natao hanandevo azy. Ny lalàna momba ny fitorahana ho faty izay tratra mijangajanaga eto dia entin’i Jesoa hampianarina ny olona hahafantatra sy hampieritreritra azy ireo raha manafaka na tsy manafaka ny fanamelohana ho faty. Tsapan’i Jesoa fa samy mpanota izy rehetra ireo hany ka tokony hifampitsimbina. Porofon’izany maha samy mpanota azy rehetra izany ny tsy fahasahian’izy ireo nitora-bato rehefa nilazan’ i Jesoa fa izay tsy nanota no aoka hitora-bato voalohany. Midika izany fa samy nanao daholo ireo olona teo ireo saingy tsy hita, samy manana ny fahotany mitovy amin’ny fahotan’io vehivavy janga io ka tokony hifamela. Raha fintinina dia lalànan’ny Fifankatiavana no tian’i Jesoa hahatongavana eto. Io rahateo moa no namintinany ny lalàna rehetra nisy taloha. « Didy vaovao no homeko anareo dia ny hifankatiavanareo ». Tsy ny Mpaminany na ny lalàna intsony amin’izao fotoana izao no tokony harahina fa i Jesoa. Izy no ilay Fitiavana, lalàna tokana sy marina tokony harahina. Entanin’ity Evanjely ity àry isika tsy hitsara olona fa samy mpanota ary koa mba hahay mifamela heloka ka hifankatia. Aleveno folo mandifotra ny fitsaratsarana olona, ary mihavana araka izay tratra fa izany no ambaran’i Jesoa miantona eo ambonin’ny Lakroa, hampihavana ny tany sy ny lanitra, hampiavana ny olombelona amin’Andriamanitra.
Père Edmond RAKOTONDRAMANANA
Aumônier

DIMANCHE 21 MARS 2010 – MESSE DU 5^ème DIMANCHE DE CARÊME

Année C – Couleur liturgique : VIOLET

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

& VAKITENY MASINA Voalohany
Bokin’i Izaia Mpaminany			Iz. 43, 16 – 21
Izao no lazain’ny Tompo, izay nanao lalana eny amin’ny ranomasina, sakeli-dalana eny amin’ny rano mahery, izay mamoaka kalesy aman-tsoavaly, sy tafika amam-piady mahery, hiantafika, - indray lavo tsy hiarina intsony izy rehetra ; voakenda sy maty toy ny lahin-jiro izy, - Aza mahatsiaro ny zavatra lasa intsony, ary aza mihevitra ny zavatra taloha intsony ! Fa indro Aho hanao zava-mahagaga vaovao ; efa hiposaka izy izao, tsy hahalala izany va ianareo ? Hanisy lalana any an’efitra Aho, sy ony eny an-tsaha karankaina. Hanome voninahitra Ahy ny biby eny an-tsaha, mbamin’ny amboadia sy ny ôstritsa, satria nanisy rano tany an’efitra Aho, sy ony eny amin’ny tany karankaina, hampisotroana ny vahoakako, ny olom-boafidiko, ny vahoaka noforoniko mba ho Ahy, ka hitory ny fiderana Ahy.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasin’i Md. Paoly Apôstôly ho an’ny Kristianina tany Filipy			Fil. 3, 8 – 14
Ry Kristianina Havana : ataoko fatiantoka tokoa ny zavatra rehetra raha oharina amin’ny fahambonian’ny fahalalana an’I Kristy Jesoa Tompoko ; fa ny fitiavako Azy no namoizako ny zavatra rehetra, ary mba hahazoako an’I Kristy, dia ataoko fakofako foana ny zavatra rehetra, mba ho hita ao aminy aho, tsy amin’ny fahamarinan’ny tenako, na ilay avy amin’ny lalàna, fa amin’ilay avy amin’ny finoana an’I Kristy dia ny fahamarinana avy amin’Andriamanitra noho ny finoana ; mba hahalala Azy aho, dia Izy sy ny herin’ny fitsanganany ho velona, ary ny fiombonana amin’ny fijaliany, ka ho tonga toa Azy amin’ny fahafatesany, sy hahatratra ny fitsanganan-ko velona, raha azoko atao. Tsy dia hoe efa mahatratra sahady aho tsy akory, na hoe efa lavorary ; fa miezaka aho mba hahatratra izay nahatratraran’I Kristy Jesoa ahy. Eny, ry Kristianina havana, tsy manao ahy ho efa nahatratra aho, fa zavatra iray ihany no ataoko, dia ny manadino izay eo aoriako, sy miezaka ho amin’izay eo alohako, mihazakazaka hanatratra ny marika aho, mba hahazoako ny loka izay iantsoan’Andriamanitra ahy eny ambony eny, ao amin’I Kristy Jesoa.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’i Md. Joany			Jo. 8, 1 – 11
Tamin’izany andro izany I Jesoa dia nankany an-tendrombohitra Oliva, fa nony maraina koa vao niverina tany an-Tempoly Izy, ka nanatona Azy ny vahoaka rehetra, dia nipetraka nampianatra azy ireo Izy ? Ary nisy vehivavy anankiray azo nijangajanga nentin’ny mpanora-dalana sy ny Farisianina, ka narosony teo afovoany. Dia hoy Izy tamin’ I Jesoa : “Ry Mpampinatra, azo nijanganjanga ity vehivavy ity. Ary Môizy ao amin’ny lalàna dia nandidy antsika hitora-bato ny olona toy izany, fa Ianao kosa mba ahoana, hoy Ianao ?” Izy no nanao izany dia ny hakany fanahy Azy, mba hisy hiampangany Azy. Fa I Jesoa kosa niondrika, dia nanoratra tamin’ny rantsan-tanany teo amin’ny tany. Ry zareo amin’izany tsy nitsahatra, fa mbola nanontany Azy ihany, ka nitraka Izy dia nanao taminy hoe : “Izay tsy manam-pahotana aminareo no aoka hitora-bato azy voalohany”. Dia niondrika indray Izy ka nanoratra teo amin’ny tany. Fa ry zareo kosa nony nandre izany, dia nihatakataka tsirairay, ny zokinjokiny no lohalalana, ka I Jesoa irery sisa nijanona sy ilay vehivavy teo afovoany. Izay vao nitraka I Jesoa, ka nanao taminy hoe : “Ravehivavy, aiza ry zareo niampanga anao teo ? Moa tsy nisy nanameloka anao va ?” Novaliany hoe : “Tsy nisy, Tompoko”. Dia hoy I Jesoa : “Izaho koa tsy hanameloka anao. Mandehana, ka aza manota intsony”.
Izany àry ny Tenin’ny Tompo	-	Dera anie ho Anao, ry Kristy !

( fifampizarana

Toky SY FANANTENANA lehibe no nomen’i Jesoa antsika …

Toky sy fanantenana lehibe no nomen’i Jesoa antsika amin'izao andron'ny Karemy izao. Raha mbola tsy nalatsany akory ny rany sarobidy dia efa nasehony ny fitiavany hamonjy antsika.

Tsy mitovy ny fihevitr'ireo vahoaka nanara-dia Azy. Nanantena ireo vahoaka fa tonga hanaja ny lalàn'i Môizy i Jeso. Kanjo, teny hampieritreritra antsika no nandreseny izany lalàna izany, teny hampandini-tena antsika, fa toy io vehivavy io koa anie ireo nanantena hanameloka sy hitora bato azy. Ny fisehoan’ny toetra tsy mendrika no samihafa. Fa raha hanameloka na hitsara ny namanao ianao dia diniho aloha ny tenanao.

Koa ny fifankatiavana sy ny fahaizana mizaka ny kileman'ny tsirairay no lalan-tokana hitondrana antsika sy hampiray bebe kokoa antsika eto am-piandrasana ilay androm-pamonjena.

“Izaho koa tsy hanameloka anao, hoy Jesoa”

Koa mirary herinandro sambatra ho antsika rehetra.

Ramatoa RAKOTONDRATSIMA Florence

Vaomieran’ny FIARAHA-MONINA

¦ soritr’asa manaraka SY VAOVAO SAMIHAFA
1.	TAKARIVA MENAMASOANDRO, 24 AVRILY 2010 : Izany no lohateny hanentanan’ny koranam-pianakaviana hataon’ny Fiangonantsika amin’ny Asabotsy 24 Avrily 2010, manomboka amin’ny 7 ora hariva ao amin’ny Crypte-ny Fiangonana Saint Dominique 16, rue de la Tombe-Issoire Paris 14ème. Métro : Saint-Jacques (Ligne N° 6) RER B : Denfert-Rochereau Ny Vidim-pidirana : Ø Mihoatra ny 12 taona : 10 € Ø 6 – 12 taona : 5 € Ø Latsaky ny 6 taona : maimaim-poana Ny fianarana ny fety dia efa nanomboka tamin’ny Zoma lasa teo, ary mamporisika antsika rehetra hanatevina izany sy hividy ary hivarotra billets. Ny vola rehetra azo amin’izany dia hanampiana manontolo ny fandehanana any amin’ny Zaikabe any “Paray-Le-Monial”.
2.	FIANARANA KATESIZY : Mitohy koa ny fampianarana katesizy sy ny fandalinam-pinoana eto amin’ny Fiangonantsika isan’alahady. Manomboka amin’ny 2 ora sy sasany tolak’andro.
3.	ZAIKA BE ANY “PARAY – LE – MONIAL”, 22 – 23 – 24 MAY 2010 : Misokatra androany ny fisoratana anarana ho an’ny amin’ny Zaikabe any Paray-Le-Monial, ny 22 – 23 – 24 May 2010 izao. Misy ny takila manazava ny momba ny Zaikabe sy taratasy fisoratana ho fenointsika izay handeha. Fandraisana anjara amin’ny saram-pilasiana sy fitaterana : Ø Mihoatra ny 12 taona : 40 € (arrhe : 20 €) Ø 5 – 12 taona : 20 € (arrhe : 10 €) Ø Latsaky ny 5 taona : maimaim-poana Mifarana ny Alahady 11 Avrily 2010 ny fisoratana anarana

” FIZARANA ANDRAIKITRA
1.	MANENTANA LITORIZIA : 28/03/2010 : VAOMIERAN’NY FINOANA (Alahady SAMPANKAZO)
2.	MANADIO FIANGONANA : 27/03/2010 : ANTOKO MPIHIRA “Feon’Anjomara”