“Mifankatiava ianareo tahaka ny nitiavako anareo”

( Joany 15, 12 )

Fiangonana Katolika Malagasy Paris sy Ile-de-France

171 Boulevard Brune – 75 014 PARIS

Site : http://www.fkmp.org/

 

H ISAN-TOKANTRANO

Alahady 22 Novambra  2009

N° 38

I JESOA KRISTY MPANJAKAN’IZAO TONTOLO IZAO – taona b

 

Ity no Alahady tsotra mamarana ny taona litorjika amin'ny taona B. Amin'ny alahady manaraka isika manomboka ny taona D sady miditra amin'ny vanim-potoanan'ny AVENT na  FIAVIANA . Sady mamarana ny vanim-potoana tsotra mandavan-taona ny Fiangonana anio no mankalaza an' i KRISTY MPANJAKA (CHRIST ROI).

 

Ao amin'ny Vakinteny Masina voalohany àry dia ambaran'i Daniela Mpaminany (Dan.7,13 – 14) fa nahita famantarana izy dia ny Zanak'olona izany, niseho teny amin'ny rahon'ny lanitra ; dia nomena Azy ny fahefana sy ny voninahitra amam-panjakana, ary tsy ho levona na oviana na oviana ny izany Fanjakana izany. Dia hoy koa i Joany Apôstôly ao amin'ny Boky Fanambarana (Apok.1, 5 – 8) hoe: “Indro Izy avy , eo amin'ny rahona, ka hahita azy ny maso rehetra ... Eny Izaho no Alfà sy Omegà, fiandohana sy fiafarana, hoy ny Tompo Andriamanitra.” Ary ny Evanjely dia i Jesoa mihitsy no manambara tena amin'ny mpisorona, amin'i Pilaty eto fa Mpanjaka Izy.Tsy misalasala Izy milaza izany fa kosa fa tsy fanjakan'izao tontolo izao ny azy.

 

Rehefa dinihintsika akaiky ity Evanjely ity dia toa tsy zakan'ny olona mihitsy ny nilazan'i Jesoa mivantana fa izy no Mpanjaka, valaketra i Pilaty ary dia lasa nivoaka ny trano mba haka toky amin'ny vahoaka. Ny filazana ny marina toy izany matetika dia tsy zakan'ny olombelona, rehefa ny tena marina no mipoitra dia sahirankirana daholo ny olona, dia mifampitodika sy mifampiresaka hoe fa nahoana no nolazaina !!! Izany no mihatra amin'i Jesoa eto. Nihorohoro avokoa ireo mpanora-dalana sy mpisorona satria voasongona ny toerany. Nipoitra ny tena marina fa i Jesoa no Mpanjaka.

 

Dia matetika isika eo amin'ny fiainana andavan'andro, indrindra eo amin'ny toeram-piasana na any am-pianarana rehefa misy hafa toa manelingelina na toa lasalasa noho isika dia matahotra isika sao dia ho voasongona ka ho lasany ny toerana ambony sy tsara. Mitodika amin'ny zava-misy eo amin'ny Firenena Malagasy isika ankehitriny : inona no mitranga? Toa samy mitady seza ny ankamaroany.

 

Nihorakoraka ny vahoaka maro mba hofantsihana sy hovonoina i Jesoa fa sao dia lasany ny toerana ambony. Ko izany àry no ivavahantsika ho an'ny tenantsika aloha, ho an'ireo mpitondra Fiangonana, mpitondra fanjakana isan'ambaratonga mba samy ho tonga saina ny olona rehetra ka ifandefitra sy ifanaja mba hisian'ny fandriam-pahalemana sy fiadanana dia ho foana miandalana ny toe-tsaina miady toerana.

Soeur RASOAMAMPIONONA Clarisse

 

DIMANCHE 22 Novembre 2009 – MESSE DU CHRIST, ROI DE L’UNIVERS

Année B – Couleur liturgique : BLANC

 

 

Jean-Marie VIANNEY

1786 – 1859

 

TAONAN’NY PRETRA

 ANNEE SACERDOTALE

Du 19 Juin 2009 au 19 Juin 2010

 

Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy  ankanavaka izy.

 

& VAKITENY MASINA Voalohany

 

Bokin’i Daniela Mpaminany

Dan. 7, 13 – 14

Nijery tamin’ny fahitana amin’ny alina aho, ka indro nisy toy ny Zanak’olona tamy, teny ambonin’ny rahon’ny lanitra ; nandroso Izy nankeo amin’ilay Anti-dahy, ka nentina ho eo anatrehany ; dia nomena Azy ny fahefana sy ny voninahitra, amam-panjakana, ary nanompo Azy avokoa ny vahoaka amam-pirenena sy ny samihafa fiteny rehetra. Fahefana mandrakizay tsy manam-pahataperana ny fahefany, ary tsy ho levona na oviana na oviana ny Fanjakany.

Izany àry ny Tenin’ny Tompo

-

Hisaorana anie Andriamanitra !

 

& VAKITENY MASINA faharoa

 

Boky Fanambaràna nosoratan’i Md. Joany

Apok. 1, 5 – 8

Homba anareo anie ny fahasoavana sy ny fiadanana avy amin’I Jesoa Kristy Ilay vavolombelona mahatoky, Lahy matoa amin’ny maty, ary Filohan’ny mpanjakan’ny tany. Ho  an’Ilay tia antsika anie, ka nanasa ny otantsika tamin’ny Rany, sy nanao antsika ho fanjakana ama-mpisoron’Andriamanitra Rainy, eny, ho Azy anie ny voninahitra amam-pahefana mandrakizay. Amen. Indro Izy avy, eo amin’ny rahona, ka hahita Azy ny maso rehetra, na dia ny an’ireo nandefona Azy aza ; ary handon-tratra ny firenena rehetra ambonin’ny tany amin’ny fahitana Azy. Eny. Amen. Izaho no Alfà sy Omegà, fiandohana sy fiafarana, hoy ny Tompo Andriamanitra, dia Ilay ankehitriny sy taloha ary ho avy, mahefa ny zavatra rehetra.

Izany àry ny Tenin’ny  Tompo

-

Hisaorana anie Andriamanitra !

 

& evanjely masina

 

Evanjely Masina nosoratan’i Md. Joany

Jo. 18, 33b – 37

Tamin’izany andro izany, dia niteny tamin’i Jesoa i Pilaty nanao hoe : « Moa Mpanjakan’ny Jody va Ianao ? » Jesoa namaly hoe : « Anao samy irery izany teny izany, sa an’olon-kafa nilaza Ahy taminao ? » Dia namaly I Pilaty nanao hoe : “Fa izaho  angaha Jody ? Ny firenenao sy ny mpisoronao no nanolotra Anao tamiko, ka inona no nataonao ?” Jesoa namaly hoe : “Tsy anisan’izao tontolo izao ny Fanjakako ; fa raha anisan’izao tontolo izao ny Fanjakako, dia ho niady ny oloko, ka tsy ho voarain’ny Jody Aho ; fa tsy anisan’izao tontolo izao ny Fanjakako”. Dia hoy I Pilaty taminy : “Koa Mpanjaka izany Ianao ?” Ary novalian’I Jesoa hoe : “ Efa voalazanao : Mpanjaka Aho. Teraka Aho, sy tonga taty an-tany mba hanambara ny marina, dia mihaino ny feoko”.

Izany àry ny Tenin’ny Tompo

-

Dera anie ho Anao, ry Kristy !

 

( fifampizarana

 

 

MPANJAKA IZANY IANAO RY JESOA ?

 

  • Raha mpanjaka Ianao dia naninona loatra no tany an-tranon’omby Ianao no teraka ?
  • I Davida mpanjaka anie nitaingina soavaly tamin’izy niditra voalohany tao Jerosalema eh ! Fa Ianao toa ampondra no nitondra Anao ?
  • Ny mpanjaka ve tsy tokony hanana mpiambina maro ka naninona no tsy nihetsika izy ireo tamin’ny Ianao nosamborina ka nofantsihana tamin’ny hazo fijaliana ?

 

Ary hoy ny Tompo hoe :

  • « Tsy anisan’izao tontolo izao ny Fanjakako … ».
  • « Ary ny fihevitro tsy mitovy amin’ny fihevitr’izy ireo … Mifanalavitra toy ny tany sy ny lanitra ny fihevitro sy ny fihevitr’izy ireo ».

 

Fa ny mahavariana anefa dia ireo olona tsy nampoizina no nahalala tamin’izany andro izany hoe iza i Jesoa :

  • Ilay jamba teo am-baravaran’i Jerosalema izay niantso mafy hoe « ry Jesoa zanak’i Davida ô, mamindra fo amiko ».
  • Ilay kapiteny romanina izay nahatsapa fa manana fahefana hafa kely i Jesoa.
  • Ilay niaraka nofantsihana taminy teo amin’ny hazo fijaliana ka nanao hoe : « Mba tsarovy izaho rehefa tonga any amin’ny fanjakanao Ianao ».

 

Ary hoantsika, iza i Jesoa ?

Tamin’ny Alahady tsotra faha 24, 13 septambra 2009, dia efa nipetraka tamintsika io fanontaniana io : Ataonao ho iza i Jesoa ?

 

Amin’izao fotoana famaranana ny taona litorzika izao dia manaitra antsika ny fiangonana amin’ireo boky « apocalyptiques » : Ny bokin’i Daniela mpaminany izay azo lazaina hoe « Apocalypse de l’Ancien Testament » ary ny boky Fanambarana nosoratan’i Md. Joany moa dia efa hoe « Apocalypse du Nouveau Testament ».

 

Hoantsika ary : Iza I Jesoa Kristy ? Mpanjaka eo amin’ny fiainantsika ve Izy ?

 

Fanontaniana tsy hitsahatra hipetraka eo amintsika kristianina, izay mpanara-dia azy, ireo fanontaniana ireo. Amin’inona ary no hamaliantsika ireo fanontaniana ireo ?

 

Rivo RASOLOFOMANANA
Birao FKMP

 

¦ soritr’asa manaraka

 

1.

ASSEMBLEE PAROISSIALE – ANKOHONAM-PIANGONANA :

Araka ny torimarika pastôraly eto amin’ny Diosezy dia samy hanao Assemblée Paroissiale indroa amin’ity taona 2009 – 2010 ity ny Paroasy tsirairay. Ka ny antsika Malagasy eto amin’ny FKMP dia ny ALAHADY 29 NOVAMBRA 2009 izao, manomboka amin’ny 2 ora tolak’andro. Tongava daholo fa sady fibeazana io no no fampisehoana ny maha-mpianakavy antsika atambatry ny Eokaristia ary samy irahana eo anivon’ny mpiara-belona : « EUCHARISTIE ET MISSION ».

2.

HASIN’ANDRIMANITRA NA DENIER DE L’EGISE 2009 ETO AMIN’NY FKMP :

Efa nanomboka tamin’ny alahady 15 novambra teo ny fanentanana antsika mianakavy amin’ny adidy fanao isan-taona eo amin’ny Hasina’Andriamanitra na Denier de l’Eglise. Tsapatsika tokoa fa mila enti-manana ny asa fandraharahana rehetra eto amin’ny Fiangonana, ka notanterahanareo ny tenin’ny Soratra Masina hoe : « fa teren’ny fitiavan’i Kristy antsika izahay…. » 2 Kôr.5, 14. Fitia tsy mba hetra, mari-pitiavana, fifanohanana satria izay tsy mahay sobika mahay fatam-bary e, hoy isika Malagasy. Samy manome izay foiny, fa izay tia mahafoy e. Koa manainga antsika rehetra isam-batan’olona, isan-tokantrano, na tanora na lehibe araka izay vitantsika, araka izay fointsika satria izay no mahafaly an’Andriamanitra, ary mari-pitiavana asehonao ny Fiangonana ;

« Samia manao  araka izay izay efa nokasainy tao am-pony avy, tsy amin’alahelo na an-tery, fa mpanome an-kafaliana no sitrak’Andriamanitra” 2 Kôr. 9, 7

 

3.

FIANARANA KATESIZY SY FANOMANA NY NOELY :

Ny fianarana katesizy dia efa nanomboka ka isaky ny alahady amin’ny 3 ora tolak’andro ao amin’ny Chapelle Saint Paul. Koa mamporisika ny ray aman-dreny hitondra sy handefa ny zanany.

Efa manomboka koa ny fanomanan’ny zanatsika ny Noely : hira sy tsianjery.

 

4.

FIVAHIANIANA MASINA HATAON’NY TANORA

Amin’ny Asabotsy 28 sy Alahady 29 novambra 2009 dia hanao Fivahianiana Masina any DOURDAN (91) ny tanorantsika miaraka amin’ny tanora ao amin’ny Paroasy Saint Pierre de Montrouge.

 

 

” FIZARANA ANDRAIKITRA

 

1.

MANENTANA LITORIZIA :

29/11/2009 : VAOMIERAN’NY FINOANA

 

2.

MANADIO FIANGONANA :

28/11/2009 : SAMPANA ANTOKO MPIHIRA « Feon’Anjomara »