“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 8 Novambra 2009	N° 36
ALAHADY FAHA 32 MANDAVANTAONA – taona b
IZAY TIA, MAHAFOY Ataoko fa voafehin’io teny kely fa mafonja io ny Vakiteny telo izay naroson’ny Fiangonana ho dinihintsika androany. Tsy hodinihina fotsiny mantsy izy io fa ezahina hiainana amin’ny fiainana an-davan’andro ary avy eo dia zaraina amin’ny hafa koa. Ny Vakiteny voalohany dia milaza fa na dia ny kely eny an-tanantsika aza dia mbola angatahin’Andriamanitra amintsika. Mafy amintsika izany hoe manome fa indrindra rehefa kely sisa no eo an-tanana, mahafaly kosa anefa ny mandray ; izany hoe mahafaly antsika ny mahazao takalony na tambiny. IZAY TIA anefa dia MAHAFOY na misy takalony na tsia. Hoy Md Paoly hoe : « TIAVA MARINA TOKOA DIA ATAOVY IZAY TIANAO ATAO » . Tsy mora koa anefa ny mitia indrindra manoloana ny mpanenjika isan-karazany ; dia hoy aho hoe izay manenjika anie ao aoriana foana e ary izay enjehina lasa aloha mandrakariva ka noho izany dia tsy tokony ho kivy manoloana izany fa tokony hiroso hatrany hanompo ilay miantso antsika amin’ny fiainana lavorary. Mitaky ny fahafoizantsika tena ny asa fanompoana, mitaky ny fahafoizana fotoana, finiavana, talenta eny fa na dia izay kely ananantsika aza. Rehefa mitia koa dia vonona ny ho mpanompo ary ny fanompoana mitaky fandeferana, mitaky fanetren-tena. Rehefa mahafoy dia tsy ilaina avonavona fa ao anatin’ny fahanginana sy fanetren-tena tanteraka; tsy ilainy ny fisehosehoana fa Andriamanitra mahita ny miafina no hamaly soa anao. Raha milaza aho fa mandray andraikitra ao amin’ny Fiangonana, mahafoy vola aman-karena , mandany fotoana amin’ny asam-piangonana kanefa tsy misy fitiavana sy entina mihebohebo fotsiny dia zava-poana izany rehetra izany. Koa raha tia marina ary isika dia mahaiza manome, mahaiza mizara izay mahasoa fa tsy ny ratsy foana akory no tanisaina isan’andro. Manam-pitiavana ve isika ? Mahaiza manampy ny namana hiala amn’ny toen-tsaina tia mitsikera fotsiny satria ny manampy ny hafa hiroso amin’ny tsaratsara kokoa dia fahafoizan-tena tena tsara. Ka izay TIA DIA MAHAFOY ary ny MAHAFOY koa dia HENIKY NY FITIAVANA.
Sœur Olga HAINGONIRIANA

DIMANCHE 8 Novembre 2009 – MESSE DU 32^ème DIMANCHE

Année B – Couleur liturgique : VERT

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

& VAKITENY MASINA Voalohany
Boky voalohan’ny Mpanjaka			1 Mpanj. 17, 10 – 16
Tamin’izany andro izany, dia niainga nankany Sareftà i Elia mpaminany. Nony mby eo am-bavahadin’ny tanàna izy, indro nisy vehivavy mpitondratena anankiray teo nanangon-kitay hazo, dia nantsoiny ka nataony hoe : « Aza mahafady, mba angalao rano kely amin’ny fisotroana aho hosotroiko ». Dia nandeha naka rano ravehivavy. Nantsoiny izy ary nataony hoe : « Dia mba itondray mofo kely eny an-tananao aho, raha sitrakao ». Fa hoy ny navaliny : « Velona ny Tompo Andriamanitrao, tsy misy zavatra masaka ao amiko ; lafarîna eran-tanana ila ao am-bilany sy diloilo kely foana ao amin’ny siny no hany ananako. Ary indro aho manangona tapa-kazo roa izao, dia hody hanamboatra izany ho anay mianaka ; hohaninay izany, dia ho faty izahay ». Fa hoy i Elia taminy : « Aza matahotra, fa modia ka ataovy izany voalazanao izany. Nefa anaovy mofo kely amin’izany aho aloha, dia ento mankaty amiko, vao manao ho anao sy ny zanakao ianao. Fa izao no lazain’ny Tompo Andriamanitr’i Israely : Ny lafarînina ao am-bilany tsy ho lany, ny diloilo ao an-tavoara tsy hihena akory, mandra-piavin’ny andro handatsahan’ny Tompo ranon’orana eto ambonin’ny tany ». Dia nandeha ravehivavy, nanao araka ny tenin’i Elia, ka nanan-kohanina ela izy sy ny ankohonany, ary i Elia koa. Ny lafarînina tao am-bilany tsy lany, ny diloilo tao an-tavoara tsy nihena, araka ny Tenin’Andriamanitra, nolazainy tamin’ny alalan’i Elia.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasy ho an’ny Kristianina Hebrio			Heb. 9, 24 – 28
Ry Kristianina Havana, tsy mba fitoerana masina nataon-tanana sy tandindon’ny tena izy fotsiny no nidiran’i Kristy, fa tany an-danitra mihitsy, mba hiseho eo anatrehan’Andriamanitra ho antsika ankehitriny. Ary tsy mba toy ny Mpisorombe niditra isan-taona tao amin’ny fitoerana masina sy nitondra ran-javatra hafa Izy, ka hoe hanolo-tena matetika ; raha izany dia ho nijaly matetika Izy hatrizay nanaovana izao tontolo izao ; fa indray mandeha monja Izy no niseho tamin’izao andro farany izao, mba hanongotra ny fahotana tamin’ny nanolorany ny Tenany ho sorona. Ary toy ny nandraiketana ny olona ho faty indray mandeha sy hotsaraina rehefa afaka izany, no nanoloran’i Kristy ny Tenany indray mandeha monja koa, mba hanala ny fahotan’ny maro, sy mbola hisehoany tsy amin’ota fanindroany, mba hamonjy izay miandry Azy.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’i Md. Marka			Mk. 12, 38 – 44
Tamin’izany andro izany, izao no nolazain’I Jesoa tamin’ny fampianarana nataony tamin’ny vahoaka : « Mahîna amin’ny mpanora-dalàna, izay tia ny mitsangatsangana miakanjo mirebareba, sy ny arahabaina eny an-kianja, ary ny fipetrahana voalohany ao amin’ny sinagôga, mbamin’ny fitoerana ambony amin’ny fanasana. Fa miseho ho manao fivavahana lavareny izy ireny, kanjo mihinana ny fananan’ny mpitondratena, ka vao mainka hohelohina mafimafy kokoa ». Ary indray andro, raha nipetraka tandrifin’ny fandatsahan-drakitra i Jesoa, dia nijery ny fandatsaky ny olona tao, ary maro ny mpanan-karena no nandatsaka be. Ary nisy mpitondratena mahantra anankiray tonga tao koa, ka nandatsaka farantsa kely roa ankevitry ny variroaventy avy. Dia nantsoin’I Jesoa ny mpianany ka nilazany hoe : « Lazaiko marina aminareo fa io mpitondratena mahantra io no nandatsaka be indrindra tamin’izay rehetra nandatsaka tao amin’ny fandatsahan-drakitra ; satria ireo rehetra ireo nandatsaka ny ambim-bavany, fa izy kosa nandatsaka izay ilainy, dia izay rehetra nananany sy ivelomany ».
Izany àry ny Tenin’ny Tompo	-	Dera anie ho Anao, ry Kristy !

( fifampizarana

IZAY TIA MAHAFOY

I Kristy no fakan-tahaka amin’ny fahadiovam-pitondrantena. Nanolotra ny tenany Izy hamonjena antsika mpanota (Vakiteny faharoa).

Nahafoy ny lafarina sy ny diloilo kely an-tanana ho an’I Elia rahavehivavy nefa tokony sakafo ho azy sy ny zanany (Vakiteny voalohany).

Narotsak’ilay mahantra ho rakitra daholo izay mba hany fananany (Evanjely Masina).

Vokany : honeran’Andriamanitra zato heny ireo fahafoizan-tena ireo.

Ny fahafoizan-tena nataon-drahavehivavy sy ilay mahantra dia mampahatsiahy avy hatrany ny fampianarana nomen’I kristy ho an’ny olombelona mba tsy ho tia harena diso tafahoatra. Hoy Izy: « Aza mihary harena ho anareo ety an-tany…, fa miharia harena ho anareo any an-danitra…fa izay itoeran’ny harenao no itoeran’ny fonao koa » (Matio 6, 19-21). Araka izany, tsaroantsika ny teniny hoe « sambatra ny mahantra am-panahy fa hahita ny Fanjakan’ny Lanitra » ary « moramora kokoa ho an’ny rameva ny miditra ao amin’ny vodim-panjaitra noho ny mpanankarena ho ao amin’ny fanjakan’ny lanitra ». Eto dia mampianatra antsika I Kristy mba hahay hifampizara, hifanampy, hiala amin’ny fitiavantena satria… « Izay tia mahafoy ». Noho izany tokony ho tia amin’ny fo sy fanahy ary saina manontolo fa tsy hoe mody tia. « Tiavo ny namanao tahaka ny tenanao » hoy izy. Ny fitiavana tokoa mantsy no fiantsoana fototra izay hangatahan’I kristy antsika isan’andro.

OHABOLANA MALAGASY MOMBA NY FITIAVANA

4 « Fitia mifamaly mahatsara ny fihavanana » (L’amitié réciproque développe la concorde)

4 « Ataovy fitia landihazo : ka ny madilana tentenana, ary ny maito tohizana » (Traitez vos amis comme on traite un fil de coton : s’il est trop mince, on y ajoute, et s’il se casse, on rattache les deux bouts)

4 « Tsy tia ka manaratsy » (Quand on n’aime pas quelqu’un, on en dit du mal)

4 « Maso sy orona, ka alahelo no iraisana » (Les yeux et le nez, c’est le chagrin qui les rapproche)

4 « Aza manao ahy sy azy » (Ne dites pas « c’est à moi », « c’est à lui »)

4 « Izay iray vatsy iray aina » (Ceux qui ont les mêmes provisions de voyage sont unis dans la vie)

4 « Ny iray tsy tia mafana, ary ny iray tsy tia mangatsiaka ; ka ataovy marimaritra hiraisana » (L’un n’aime pas chaud, l’autre n’aime pas le froid ; donc faites tiède pour rester d’accord)

Lanto RAKOTOARIMANANA

Vaomieran’ny KOLONTSAINA

¦ soritr’asa manaraka
1.	FILAN-KEVITRA PASTORALY : Mbola hanao fivoriana manokana ny Filan-kevitra Pastôraly ny Alahady 15 novambra izao handinihana eto amin’ny Chapelle Saint Paul. § Ny teti-bola 2009 – 2010. Koa iangaviana ny Vaomiera sy Sampana tsirairay avy samy hanomana izany.
2.	FILAN-KEVITRA IOMBONANA ANCMF : Vita soa aman-tsara ny fivorian’ny Filan-kevitra Iombonan’ny ANCMF izay natao ny Asabotsy 31 oktobra sy ny alahady 1 novambra 2009 teo tany Nice. Dimy mirahalahy no solontena avy eto amin’ny FKMP dia ELIASY Liva, RANAIVOSON Nary , RASOLOFOMANANA Rivo avy ao amin’ny Birao, RAZAFIMAHATRATRA Pierre avy amin’ny Vaomieran’ny Finoana ary RAKOTOHARISON Hasina, Prezidàn’ny Vaomieran’ny Tanora (ny sary miaraka amin’i Mgr Fulgence RABEMAHAFALY, Arsevekan’i Fianarantsoa sady Filohan’ny Fivondronamben’ny Evekan’i Madagasikara). Hitondra AINGA VAO mifototra amin’ny pastôraly no imasoan’ny ANCMF manomboka izao. Homena endrika vaovao ny gazety OLOMBAOVAO, izay fitaovana pastôraly. Ary ny Zaika be 2010 dia hatao any « Parail – Le Monial » ny Asabotsy 22 sy Alahady 23 ary ny Alatsinainy 24 may 2010 (Week-End de Pentecôte, 2010).
3.	FIANARANA KATESIZY : Ny fianarana katesizy dia efa nanomboka ka isaky ny alahady amin’ny 3 ora tolak’andro ao amin’ny Chapelle Saint Paul. Koa mamporisika ny ray aman-dreny hitondra sy handefa ny zanany.
4.	FIVAHIANIANA MASINA HATAON’NY TANORA Amin’ny Asabotsy 28 sy Alahady 29 novambra 2009 dia hanao Fivahianiana Masina any DOURDAN (91) ny tanorantsika miaraka amin’ny tanora ao amin’ny Paroasy Saint Pierre de Montrouge.
5.	FANASANA – SOIREE CMZE AO MONTANA (94) : Ny Catholiques Malgaches et Zanatany d’Evry (CMZE) dia manasa ny rehetra amin’ny Dîner dansant hataon’izy ireo ny Asabotsy 14 novambra 2009, manomboka amin’ny 9 ora alina. Ny toerana dia ao Montana (94) : 76 – 78, avenue Barbusse – Val Pompadour (N 6), 94460 VALENTON. Fandraisana anjara : Ankizy : 12 € , Lehibe : 16 € na 26 € (araka ny sokajy taona).

” FIZARANA ANDRAIKITRA
1.	MANENTANA LITORIZIA : 15/11/2009 : Maintimolalin’ny SAINT MICHEL
2.	MANADIO FIANGONANA : 14/11/2009 : BIRAO