“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 18 Oktôbra 2009	N° 33
ALAHADY FAHA 29 MANDAVANTAONA – TAONA B
Mandalo fijaliana ny voninahitra tena izy. Eny an-dalana mandeha mankany Jerosalema i Jesoa sy ny mpianany amin’ity Evanjely nosoratan’i Md Marka ho antsika androany ity. Handeha ho any Jerosalema izy ireo ary ho faty any i Jesoa, hatolotra ny mpisorona sy ny loholona. Tsy mitsahatra mananbara izany hahafatesany izany amin’ny mpianany Izy. Teo anatrehan’izany fanambaran’i Jesoa Azy ho faty izany no mangataka Aminy i Jakoba sy Joany zanak’i Zebede mba hipetraka eo an-kavia sy an-kavanana. Fantratr’izy roalahy fa hitsangana amin’ny maty i Jesoa ary handray ny voninahiny satria Mesia afaka mandresy an’izao tontolo izao. Tanteraka ara-bakiteny eto ny atao hoe « fitadiavan-tseza » ho azy roalahy. Araraotin’i Jesoa hampianarana ny mpianany io fangatahana seza tadiavin’izy roalahy io. Ataony mazava fa tsy maintsy mandalo fijaliana vao tonga amin’ny voninahitra tena izy, ilay seza eo an-kavia sy an-kavanany. « Moa mahasotro izay kapoaka ho sotroiko va ianareo na mahazaka ny batemy izay hanaovana batemy Ahy ? » Hoy i Jesoa manambara izany fahasarotan’ny lalana mankamin’ny voninahitra izany. Ny kalisy sy ny batemy moa dia famantarana ny zavatra mafy sy mangidy tsy maintsy hatelina. Ny fijaliana angatahi’i Jesoa amin’ireo mpianany dia tsy fijaliana miafara amin’ny hazo fijaliana toy ny nataony fa ny fanompoana ny namana. « Izay te ho lehibe aminareo no aoka ho mpanompo anareo, ary izay te ho ambony indrindra aminareo no aoka ho mpanomponareo rehetra ». Io fanompoana ny namana io no lalana hitan’i Jesoa hitondrantsika ny hazofijaliana sady mampilamina ny fiainantsika an-davanandro. Ny fiadiana voninahitra sy seza manko dia mety mampikorontana indraindray. Hita izany tamin’ireto mpianatra ireto. Tezitra tamin’i Jakoba sy Joany izay nangataka ny hipetraka eo an-kavia sy an-kavanana ny folo lahy. Tsy ny fangatahan’izy roalahy no diso fa ny folo lahy mba te hahazo toerana no olana. Velom-pialonana ny folo lahy satria samy mba maniry ny hahazo ny toerana eo an-kavia sy an-kavanana.
Père Edmond RAKOTONDRAMANANA
Aumônier

DIMANCHE 18 Octobre 2009 – MESSE DU 29^ème DIMANCHE

Année B – Couleur liturgique : VERT

Jean-Marie VIANNEY 1786 – 1859

TAONAN’NY PRETRA ANNEE SACERDOTALE Du 19 Juin 2009 au 19 Juin 2010 Ho fahatsiarovana ny faha-150 taona ny nahafatesan’i Mompera Jean-Marie VIANNEY, Curé tao Ars. Izay Olomasina mpiaro ny Mompera Curé rehetra. Mandritra izao fankalazana ny taonan’ny Pretra izao dia lasa mpiaro ny Pretra rehetra tsy ankanavaka izy.

& VAKITENY MASINA Voalohany
Bokin’i Izaia Mpaminany			Iz. 53, 10 – 11
Sitraky ny Tompo ny nanorotoro ny Mpanompony tamin’ny fijaliana, nefa rehefa voaatitry ny fanahiny ny sorom-panorenana, dia hahita taranaka izy, ho lava andro iainana, ary hambinina eo an-tanany ny hevitra nokasain’ny Tompo. Noho ny fijalian’ny fanahiny, dia nahita izy, ka ho afa-po. Ilay marina, Mpanompoko, noho ny fijaliany, hanamarinana olona betsaka, ary ny tenany hivesatra ny helok’ireo.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasy ho an’ny Kristianina Hebrio			Heb. 4, 14 – 18
Ry Kristianina havana, manana Mpisorombe lehibe isika izay lasa namaky ny lanitra, dia i Jesoa Zanak’Andriamanitra, koa aoka hotanantsika mafy ny finoana efa nekentsika. Satria tsy Mpisorombe tsy mahalala mangoraka ny fahalementsika no antsika ; fa efa nalaim-panahy tahaka antsika tamin’ny zavatra rehetra Izy, afa-tsy ny fahotana. Koa aoka isika hanatona ny fiketrahan’ny fahasoavana amim-pitokiana, mba hahazoantsika famindram-po, sy hahitantsika fahasoavana ary hamonjena antsika amin’ny andro hilàntsika izany.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’i Md. Marka			Mk. 10, 35 – 45
Tamin’izany andro izany, nanatona an’i Jesoa i Jakôba sy i Joany zanak’i Zebede ka nanao hoe : « Ry Mpampianatra ô, tianay mba hataonao aminay izay hangatahinay aminao ».  Ary hoy Izy : « Inona no tianareo hataoko aminareo ? » Dia hoy ireo : « Aoka ny anankiray aminay mba hipetraka eo ankavananao ary ny anankiray eo ankavianao any amin’ny voninahitrao ». Ary hoy i Jesoa taminy : « Tsy fantatrareo izay angatahinareo, moa mahasotro ny kapoaka izay hosotroiko va ianareo, na mahazaka ny batemy izay hanaovana batemy Ahy ? » Hoy ireo : «  Zakanay ». Fa hoy kosa i Jesoa : « Raha ny kapoaka hosotroiko, dia hosotroinareo ihany tokoa, ary ny batemy hanaovana batemy Ahy dia hanaovana batemy anareo ihany koa ; fa raha ny hipetraka eo ankavanako sy eo anakaviako kosa, dia tsy Ahy ny hanome izany, fa ho an’izay nanamboarana azy ihany izany ». Nony nandre izany izy folo lahy dia tezitra tamin’i Jakôba sy i Joany ; fa nantsoin’i Jesoa izy ireo ka nilazany hoe : « Fantatrareo fa amin’ny fanjakan’izao tontolo izao, dia ny mpifehy no mitsangana ho tompo mandidy, ary ny lehibe no miseho ho mpifehy manam-pahefana. Fa aminareo kosa tsy mba tahak’izany ; fa izay te ho lehibe indrindra no aoka ho mpanompo anareo, ary izay te ho ambony indrindra eo aminareo no aoka ho mpanomponareo rehetra. Fa ny Zanak’olona tsy mba tonga hotompoina, fa mba hanompo ary hahafoy ny ainy ho fanavotana ny maro ».
Izany àry ny Tenin’ny Tompo	-	Dera anie ho Anao, ry Kristy !

( fifampizarana

IZAY TE HO LEHIBE NO MPANOMPO

Matetika manelingelina antsika ity tenin’ny Tompo ity hoe : “Izay te ho lehibe indrindra no aoka ho mpanompo anareo”. Te azo zavatra anefa tsy te hisahirana. Mora ho antsika ny mangataka noho ny manome. Nefa efa voalaza koa fa sambatra kokoa ny manome. Mifanohitra amin’ny hevitsika andavandro ny fampianaran’ny Evanjely. Mitady toera-malemy anorenam-pangady matetika ny olona fa tsy te hisahirana. Miandry tolorona fa tsy miasa ets…Isika vita batemy izay mpanara-dia an’I Kristy anefa tsy maintsy mahafoy tena, mahafoy andro amin’ny asa fanompoana. Satria “I Kristy (ny Zanak’olona) dia tsy tonga hotompoina, fa mba hanompo ary hahafoy ny ainy ho fanavotana ny maro”.

Maro ny asa sahanina eto amin’ny Fiangonantsika. Tsy tokony hisalasala isika ny hirotsaka. Samy manana ny toerana anefàny izany araka ny safidim-po sy talentan’ny tsirairay. Tsy mitady toerana, na mitady voninahitra fa mianatra manetry tena. Ary ny toerana dia mitaky asa fanompoana. I Kristy dia tonga nanatanteraka ny Sitrapon’Andriamanitra, isika koa dia ho torak’izany. Raha voninahitra no tadiavintsika ato am-piangonana dia ho kivy vetivety isika satria ny Hazofijaliana no rehareha ato am-piangonana. Io no famantarana ny famonjena antsika. Ny fanetren-tena no mampifanatona sy mampifankatia satria mandray ny hafa toy ny tena ka mahay mifanompo. Miezaka ny Vaomieran’ny Fifandraisana manampy antsika amin’izany. Mirary herinandro vaovao antsika rehetra indray.

Emma RAKOTOMANANTSOA

Vaomieran’ny FIFANDRAISANA

¦ soritr’asa manaraka
1.	MIARAHABA : Miarahaba an’izy 11 mianadahy ny Fiangonana Katolika Malagasy eto Paris sy Ile de France (FKMP) iray manontolo tamin’ny nandraisan’izy ireo ny Sakramentan’ny Konfirmasio ny alahady 11 oktobra 2009 teo : Haingo, Erica, Hanitra, Mitsoa, Nampoina, Aude, Typhanie, Diana, Anja, Faly ary Lanto. Androm-pahasoavana izany. Hahefa be eo amin’ny asa fanompoana sy ny fitoriana ny Vaovao Mahafaly anie izy ireo. Mahereza, soava dia.
2.	FILAN-KEVITRA IOMBONANA ANCMF : Ny Asabotsy 31 oktobra sy alahady 1 novambra 2009 izao no hatao any Nice ny Filan-kevitra Iombonana ato amin’ny ANCMF. Izany dia hatao any Nice. Telo isam-piangonana no solontena amin’izany : Ny pretra, ny Prezidà na ny solontenany, ny Prezidàn’ny tanora na ny solontenany. Nantsoina manokana koa moa ireo rehetra izay afaka ho any fa tsy manan-jo handatsa-bato.
3.	FIANARANA KATESIZY : Ny fianrana katesizy dia efa nanomboka ka isaky ny alahady amin’ny 3 ora tolak’andro ao amin’ny Chapelle Saint Paul. Koa mamporisika ny ray aman-dreny hitondra sy handefa ny zanany. Ny alahady voalohany volana kosa dia natokana ho an’ny Vaomieran’ny Kolontsaina.
4.	NY FOTOANANTSIKA MANARAKA : Dia ny alahady 25 Oktobra 2009 any amin’ny Chapelle Saint Paul toy ny mahazatra isan’alahady. Ny Sorona Masina dia manomboka amin’ny 4 ora tolak’andro.
5.	FIANTSOANA FIVORIANA : Ny Filan-kevitra Pastôraly dia hantsoina hivory hamonjy ny fivoriana ara-potoana izay hatao ny Alahady 25 Oktôbra 2009 izao, manomboka amin’ny 2 ora tolak’andro. Izany dia hatao eto amin’ny Chapelle Saint Paul. § Ho dinihana amin’izany ny lamin’asa pastôraly 2009 – 2010 eto amin’ny FKMP § Ny teti-bola 2009 – 2010. § Ny fivoriana hataon’ny Filan-kevitra iombonana ao amin’ny ANCMF any Nice ny Asabotsy 31 Oktobra sy Alahady 1 Novambra 2009 izao.

” FIZARANA ANDRAIKITRA
1.	MANENTANA LITORIZIA : 25/10/2009 : Vaomieran’ny FIARAHA-MONINA
2.	MANADIO FIANGONANA : 24/10/2009 : Vaomieran’ny TANORA