“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 05 Jolay 2009	N° 23
ALAHADIN’NY FAHA- 14 MANDAVANTAONA – TAONA B

NY MPAMINANY TSY MASINA AN-TANINY

Madiva ho tapitra ny tao-pikatrohana ara-pastoraly. Ny alahady 26 Jolay no lamesa farany iarahantsika amin’ity taona 2008 -2009 ity. Maro ireo efa lasa nandao ny toerana mahazatra mba hiataka kely hialasasatra. Maro koa ireo vao handeha atsy ho atsy. Tsy vitsy koa anefa ireo hijanona eo amin’ny fonenana mahazatra. Mirary fialantsasatra mahafinaritra ho anareo rehetra ; na ho anareo izay handeha lavitra na ho anareo izay hijanona ao an-trano ny tenako.

Natokana handinihantsika ny tantaran’I Jesoa teo amin’ny tany nahabe Azy ny alahady androany. Tantara manambara ny tsy finoan’ny mpiaramonina ny maha Andriamanitra Azy. Hany ka nahatonga azy ireo hankahala: “Moa tsy io va ilay mpandrafitra zanak’I Maria….”hoy izy ireo maneso Azy.

Fantatry ny mpiaramonina taminy tokoa manko ny tantaran’I Jesoa: teraka tao Betlehema Izy tamin’ny adron’ny fanisam-bahoaka. Nandany ny fahazazany sy ny fahatanorany tao Nazareta ilay tananakely ambanivohitra . Nivelona tamin’ny fambolena (oliva, voaloboka ary varimbazaha) sy fiompiana osy ny mponina tao amin’io tanana io . Samy manao izay hahavelona azy ny fianakaviana tsirairay. Miangona ao sinagoga ny mpiray tanana isaky ny Asabotsy.

Tao anatin’io tontolo ambanivohitra io I Jesoa no novolavolaina. Fiainana tsotra mitovy ny an’ny olon-drehetra ny fiainany: mpandrafitra, nipetraka tamin’ny tany novelarina tsihy rehefa hisakafo. “Dépanneur” teo amin’ny Tanana raha sendra nisy jiogan’omby tapaka. Raha tsorina dia tsy misy iavahany amin’ny fiainan’ny olona ny fiainan’I Jesoa. Fiainan’ny tantsaha tsy nanao fianarana ambony . Ny tontolony dia Nazareta.

Nankahalain’ny olona tao amin’ny Sinagoga Izy rehefa nitoriteny. Satria tsy nifanaraka amin’ny fahitany an’I Jesoa ny fahaizana nampisehoany.Tototry ny fialonana ny fiainany .Ratsy endrika eo imason’izy ireo Izy satria misongona ny fahaizana sy ny fahendren’izy ireo I Jesoa.

Inona no azo tsoahina ?

- Tsy tena mahalala an’I Jesoa ny mponin’I Nazareta. Tapany ny fahalalan’izy ireo ny momba an’I Jesoa. Ny lafina maha olombelona no fantany fa hadinony ny maha Andriamanitra an’I Jesoa. Ny tena fahalalana an’I Jesoa dia tsy ara-batana fotsiny fa tsy maintsy miaraka amin’ny ara-panahy. Mampitandriana antsika amin’ny fandraisana ny sakramenta rehetra izany. Ny sakramenta dia famantarana manambara sy mampahazo fahasoavana. Tsy hoe rehefa mandray ny vatana sy ran’I Jesoa dia azo lazaina fa mifandray sy mahalala Azy tanteraka.Tsy maintsy arahina finoana ary finoana iainana fa tsy atao am-bava fotsiny. “Ny rahalahiko sy anabaviko” hoy Izy dia izay mananao ny sitrapon’ny Raiko.

- Ny tsy fahombiazan’ny Jesoa teo anatrehan’ireo mpiaramonina taminy dia manambara ny fanajany ny fahafahan’ny olona tsirairay. Tsy manery antsika Andriamanitra , mamela antsika hisafidy na hino na tsy hino. Anjarantsika ny misafidy satria efa napetraka eo anoloantsika ny fiainana sy ny fahafatesana.

- Ho antsika kristianina amin’izao fotoana izao, I Krsity no ohatra natao hankahery antsika raha sanatria sendran’ny tsy fahombiazana eo amin’ny asa pastoraly ( isam-boamiera ohatra). Tsy mora ny fitoriana ny vaovao mahafaly na ao am-piangonana, na ao an-tokatrano na eo amin’ny mpiaramonina. Mahereza daholo.

P. Edmond RAKOTONDRAMANANA

Aumônier

DIMANCHE 05 JUILLET 2009 – MESSE DU 14^ème DIMANCHE

Année B – Couleur liturgique : VERT

OLONTSAMBATRA – BIENHEUREUX

FRERE RAPHAËL – LOUIS RAFIRINGA (1856 – 1919)

& VAKITENY MASINA Voalohany
Bokin’I Ezekiela Mpaminany			Ez. 2, 2 – 5
Tamin’izany andro izany, dia niditra tato anatiko ny Fanahy, sady nampitsangana ahy, ka nandre ny Tompo niteny tamiko aho. Hoy Izy tamiko : “Ry zanak’olona, indro ianao irahiko, ho any amin’ny zanak’I Israely, ho any amin’ireo vahoaka mpiodina izay niodina tamiko, fa efa nanota tamiko, mandrak’androany aza, ireo sy ny razany. Ireo zanaka manao tarehy tsy mahalala menatra sy mafy fo ireo, no anirahako anao. Izao no holazainao aminy : Izao no Tenin’ny Tompo Andriamanitra. Ka na hihaino izy ireo, na tsy hihaino, - fa taranaka mpiodina izy – dia hahalala fa misy Mpaminany eo aminy.”
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasy faharoan’I Md paoly Apôstôly ho an’ny Kristianina tany Kôrinty			2 Kôr. 12, 7 – 10
Ry Kristianina havana, fandrao mirehareha noho ny halehiben’ireo fanambaràna aho, dia nasiana tsilo tao amin’ny nofoko, dia anjelin’I Satàna hamely tehamaina ahy, mba tsy hireharehako. Ny amin’io dia intelo aho no nangataka tamin’ny Tompo, mba hanalany an’io amiko, fa izao no navaliny ahy : “Ampy ho anao ny fahasoavako, sady amin’ny fahalemena indrindra no iamparan’ny heriko “. Koa dia vao mainka sitrako azan y ny hirehareha amin’ny fahalemeko, mba hitoeran’ny herin’I Kristy amiko. Izany no ifaliako amin’ny fahalemeko, amin’ny fahafaham-baraka, amin’ny fahaterena, amin’ny fanenjehana, amin’ny fahantrana, noho ny amin’I Kristy, satria ny fahalemeko no heriko.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’I Md. Marka			Mk. 6, 1 – 6
Tamin’izany andro izany i Jesoa nankany amin’ny tany nahabe Azy, ary nanaraka Azy ny mpianany. Ary rehefa sabata ny andro, dia nampianatra tao amin’ny sinagôga Izy, ka be tamin’izay nihaino azy no gaga tamin’ny fampianarany sy nanao hoe : « Taiza no nahazoan’Izy io izany rehetra izany ? Fahendrena manao ahoana izao nomena Azy izao, ary ahoana no ahefan’ny tanany izany asa lehibe izany ? Moa tsy io va ilay mpandrafitra, zanak’I Maria, rahalahin’I Jakôba sy Jôsefa ary I Joda sy I Simôna ? Moa tsy aty amintsika va ny anabaviny ?” Dia tafintohina taminy izy ireo. Fa hoy I Jesoa taminy : “Tsy misy mpaminany tsy enin-kaja afa-tsy amin’ny amin’ny taniny sy amin’ny fianakaviany ary amin’ny havany ihany.” Ary tsy nahazo nanao fahagagana akory Izy teo, fa marary vitsivitsy monja no nositraniny tamin’ny fametrahan-tanana, ary gaga Izy noho ny tsy finoan’ireo. Dia nitety ny vohitra manodidina Izy sy ny mpianany
Izany àry no Tenin’ny Tompo	-	Dera anie ho anao ry Kristy!

( fifampizarana

NY FAHALEMEKO NO HERIKO

Tahaka ny nahazo ny mpaminany Ezekiela dia nahita faminaniana koa I Md Paoly. Mamporisika hanohy ny iraka nampanaovina. Tsy natao ireharehana izany fa sao ny Satàna no mahazo vahana ao amintsika. Ny fisedrana tsilo manindrona, ny fanenjehana, ny fihavonavonana, ny fampisarahambazana dia asan’ny Satàna avokoa. Fa isika kosa raha manefa iraka dia amin’ny anaran’I Kristy irery ihany. Na mafy aza ireny dia ampy antsika ny fahasoavan’Andriamanitra ka tsy mba ireharehana ny asa vita fa ny fanetren-tena izay heverin’izao tontolo izao fahalemena dia herintsika kristianina raha miaraka amin’I Kristy tokoa isika. Dia ho azontsika ny hevitry ny fiteny hoe : “Ny fahalemeko no heriko”. Aza mitandro hasasarana àry manompo ity FKMP ity. Tsy sakana velively ho an’ny fitoriana ny Vaovao Mahafaly ny fahalemena. Izahay mahalala an’I Kristy, Ilay Tompo sy Andriamanitra ary manatanteraka ny didim-pitiavany no mahery ao Aminy. Ny finoana tsy arahin’asa tokoa dia maty. Tsy ny fanenjehana na ny fialonana no manaitra ny Tompontsika raha niditra tao amin’ny tanàna nahabe Azy tao Nazareta Izy, fa ny nahatonga izany dia ny tsy fahampian’ny finoana miteraka fahamafisan-doha, fihatsarahambelatsihy, fialonana. Koa mamporisika antsika izahay Vaomieran’ny Fifandraisana ifanome Tanana hiara-hisalahy hatrany eto amin’ny asa anirahana antsika eto FKMP isika mianakavy fa an’Andrimanitra irery ihany ny voninahitra mandrakizay. Mirary fialan-tsasatra sambatra ho an’izay efa handeha izahay ary fitonian-tsaina mahafinaritra tsara ho an’izay tsy mandeha.

Andrianome RAKOTOMANTSOA

Vaomieran’ny Fifandraisana

¤ VAOVAOM-PIANGONANA
1.	FAMANGIANA PASTORALY Misaotra an’Andriamanitra ary misaotra antsika mainakavy fa vita soa aman-tsara ny fitsidihana pastoraly nataon’i Mgr Eric de MOULINS-BEAUFORT, Eveka Mpanampy eto amin’ny Diosezin’iParis, tamin’ny alahady 28 jona lasa teo. Nisy koa moa ny fitsofan-drano ny fametrahana ny sarin’I Frera Raphaël-Louis RAFIRINGA, eo akaikin’ny an’I Victoire RASOMANARIVO ao am-piangonana.
2.	ZAIKAM-PARITRA ANY LISIEUX 03 – 04 OKTOBRA 2009 Miatrika izany isika FKMP ary isan’ny Fiangonana zokiny ato amin’ny ANCMF. Koa miomana dieny izao fa maro ny andraikitra miandry antsika. Ny fisoratana dia manomboka iandraiketan’ny Vaomieran’ny Fifandraisana sy ny Vaomieran’ny Fitantanana.

ü VAOVAO NASIONALY

1.

ZAIKAM-PARITRA AVARATRA Ny Zaikam-paritra Avaratra dia hatao ny Asabotsy 3 sy Alahady 04 Oktobra 2009 any Lisieux misy ny Carmel sy ny Basilique ny Sainte Thérèse de l’Enfant Jésus (14 – Calvados). Manomboka izao ny fisoratana anarana ary mifarana ny alahady 26 jolay 2009. Koa alohan’ny handehananao hiala sasatra (hanao vacances) dia misorata anarana. Miezaka ny FKMP mba ho maro be isika no afaka handray anjara amin’izany, fa fotoan-dehibe koa izany.

¦ soritr’asa manaraka
1.	FIVORIAN’NY FILAN-KEVITRA PASTORALY Ny fivorian’ny Filan-kevitra pastoraly ara-potoana eto amin’ny Fiangonantsika dia hatao ny Alahady 19 Jolay 2009 izao. Hisy fiantsoana ho an’ireo mpikambana amin’izany.

” FIZARANA ANDRAIKITRA
1.	MANENTANA LITORIZIA : 12/07/2009 : Vaomieran’ny FIARAHA-MONINA
2.	MANADIO FIANGONANA : 11/07/2009 : Vaomieran’ny FITANTANANA

Rakitra	28/06/2009	128, 90 €
	Volana Jona	618, 54 €