“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 17 May 2009	N° 18
ALAHADY faha 6 – FANKALAZANA NY PAKA – TAONA B

Tahaka ny nitiavan’ny Ray Ahy no no nitiavako anareo koa

Maro be ireo fombafomba sy lalàna ary fomba amam-panao teo amin’ny Jody. Tsy ho voatanisa eto izy rehetra. Nofehezin’I Jesoa ho lalàna tokana izany lalàna izany: ny lalànan’ny Fitiavana : “Tsy misy manam-pitiavana lehibe mihoatra izay nahafoy ny ainy ho an’ny tiany ...”.

Io Lalànam-pitiavana io no hatolotr’I Jesoa hiainantsika tsirairay androany. Mety hanontany tena isika manao hoe: ahoana no hahatanterahan’izany fitiavana izany amin’izao tany miady feno herisetra, feno fanavakavaham-bolon-koditra, feno fitiavan-tena, feno tsy fifampitokisana izao ? Ahoana no hahafahana mitia raha mahatsapa ny olona iray fa izy dia tsy misy mitia ? Ny fahalementsika sy ny fahosantsika ve manankana antsika tsy hitia marina tokoa ?

I Jesoa no mamaly ireo fanontaniana ireo : “Tsy ianareo no nifidy Ahy, fa izaho no nifidy anareo mba hamokaranareo sy hitondranareo vokatra …”.

Mila antsika I Jesoa, nofidiany araka ny toetrantsika, araka ny toerana misy antsika, araka ny fahosantsika sy ny halementsika isika. Tahaka izany no nifidianany ny mpianany : ao ny mpanjono, ao ny mpamory hetra, ao ny dokotera … Tsy mangataka antsika ho tonga toy ny olona tsy mahazatra antsika I Jesoa. Ny hany hangatahany amintsika dia ny “fifankatiavana” eo amin’izay toerana misy antsika tsirairay avy : ao an-tokantrano, ao am-piasana ...

Tsy hitantsika vatana eo afovoantsika intsony I Kristy tafatsangan-kovelona fa mila antsika Izy hanambara io Fitiavana io. Mila ny masontsika Izy mba hijery izay olona tsy misy mijery, mila ny vavatsika Izy mba hankahery ireo izay reraka sy ketraka amin’ny fiainana, mila ny sofintsika Izy mba hihaino izay tsy misy mpihaino, mila ny tanantsika Izy mba hifampizara amin’izay tsy manana, mila ny fontsika sy ny fahaizana amam-pahalalantsika izy mba hanangana tontolo vaovao hanjakany rariny sy ny fahamarinana ary ny firahalahiana.

Ao amintsika, amin’ny alalan’ny Fanahy Masina, no lalan’ny fitiavana. Matoky antsika Izy. Noho izany, metèza hantsoin’I Jesoa satria tia antsika Izy.

P. Edmond RAKOTONDRAMANANA

Aumônier

DIMANCHE 17 MAI 2009 – 6^ème DIMANCHE DE PAQUES
Année B – Couleur liturgique : BLANC

ÿ Regina caeli

Ry Mpanjakavavin’ny lanitra mifalia, Aleloia !

- Satria Ilay nentinao tany am-bohoka, Aleloia !

Dia efa nitsangan-ko velona araka ny teniny, Aleloia !

- Mivavaha amin’ Andriamanitra ho anay, Aleloia !

Mifalia sy miravao, ry Maria Virjiny, Aleloia !

- Satria nitsangan-ko velona tokoa ny Tompo, Aleloia !

Aoka isika hivavaka

Ry Andriamanitra , Ianao nampientan-kafaliana an’izao tontolo izao tamin’ny nitsanganan’I Jesoa Kristy Zanakao Tomponay ; koa mihanta aminao izahay , enga anie noho ny vavak’I Maria Virjiny dia mba homenao anay ny fiainantsambatra mandrakizay . Amin’ny alalan’I Kristy Tomponay. Amen.

& VAKITENY MASINA Voalohany
Boky mitantara ny Asan’ny Apôstôly			Asa. 10, 25 – 26. 44 – 48
Tamin’izany andro izany, raha vao nidina tao Sezarea I Piera, dia notsenain’I Kôrnely, kapiteny rômanina, ka sady niankohoka teo an-tongony izy no nitsaoka azy. Fa nasain’I Piera nitsangana izy, nataony hoe : “Mitsangàna, fa olona ihany aho”. Dia niloa-bava I Piera ka nanao hoe : “Hitako marina tokoa fa tsy mizaha tavan’olona Andriamanitra : fa izay matahotra Azy sy manao ny marina, dia ankasitrahany, na aiza na aiza firenena misy azy”. Mbola miteny eo I Piera no nidina tamin’izay rehetra nihaino ny teniny ny Fanahy Masina ka talanjona fatratra ny mpino voafora, tonga teo niaraka tamin’I Piera, nahita fa nidina tamin’ny Jentily koa ny fanomezan’ny Fanahy Masina, satria reny niteny fiteny samihafa sy nankalaza an’Andriamanitra izy ireo. Dia hoy I Piera : “Azo lavina tsy hatao Batemy amin’ny rano va ireto olona efa nandray ny Fanahy Masina toa antsika ireto ?”. Koa ireo, nasainy natao Batemy amin’ny anaran’I Jesoa Kristy Tompo ; izy kosa nangatahin’ireo hitoetra eo aminy andro vitsivitsy.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasy voalohan’i Md Joany Apôstôly			1 Jo. 4, 7 – 10
Ry hava-malala, aoka hifankatia isika, fa ny fitiavana dia avy amin’Andriamanitra, sy mahalala an’Andriamanitra. Izay tsy tia dia tsy mahalala an’Andriamanitra, satria Andriamanitra dia fitiavana. Ary nampiseho ny fitiavany antsika Izy, tamin’ny nanirahany ny Zanany Lahy tokana ho amin’izao tontolo izao, mba hahavelona antsika amin’ny alalany. Ary toy izao izany fitiavana izany : tsy isika no tia an’Andriamanitra rahateo, fa Izy no tia antsika mialoha, sy naniraka ny Zanany ho sorom-panavotana antsika amin’ny fahotantsika.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’i Md Joany			Jo. 15, 9 – 17
Tamin’izany andro izany, I Jesoa niteny tamin’ny mpianany nanao hoe : ‘Tahaka ny nitiavan’ny Ray Ahy no nitiavako anareo koa, koa mitomoera amin’ny fitiavako ianareo. Raha mitandrina ny didiko ianareo no hitoetra amin’ny fitiavako, tahaka ny nitandremako ny didin’ny Raiko sy itoerako amin’ny fitiavany. Izaho no milaza izany aminareo, dia mba ho ao aminareo ny fifaliako, ary mba ho lavorary ny fifalianareo. Izao no didiko, dia ny mba hifankatiavanareo tahaka ny nitiavako anareo. Tsy misy manam-pitiavana lehibe kokoa noho ny mahafoy ny ainy ho an’ny sakaizany. Ianareo no sakaizako, raha manatanteraka izay andidiako anareo. Tsy ataoko hoe mpanompo intsony ianareo, satria ny mpanompo tsy mahalala izay ataon’ny tompony ; fa efa nataoko hoe sakaiza ianareo, satria efa nambarako taminareo avokoa izay rehetra reko tamin’ny Raiko. Tsy ianareo no nifidy Ahy, fa Izaho no nifidy anareo, ka nanendry anareo mba handehananareo sy hahavokaranareo, ary haharetan’ny vokatrareo, sy hanomezan’ny Raiko anareo izay rehetra hangatahinareo amin’ny Anarako. Ny andidiako anareo dia ny mba hifankatiavanareo”.
Izany àry ny Tenin’ny Tompo	-	Dera anie ho Anao, ry Kristy !

( fifampizarana

“FITIAVANA”

Ny Fitiavana saro-bikaina

Takarina sarotra alaina

Nefa lova nomen’ilay Tsitoha

Kanto sy mendrika koa !

Ny Fitiavana, mandefitra

Ny Fitiavana, maharitra

Ny Fitiavana tsy mifidy tavan’olona,

Mampitsiky fa tsy mampiolonolona.

Ny Fitiavana mamy toa tantely,

Sarobidy toa Vatosoa,

Mamiratra toa Volamena,

Diloilo manamanitra ny akany soa !

ZOARIMAMY

Vaomieran’ny FITANTANANA

	NY SOA IFANDOVANA
“Tsy mifidy olon-kotiavina Andriamanitra” Mandalo ny fitsapan'Andriamanitra isika olombelona ka tsy maintsy miatrika ny sedran'ny fiainana, satria mandia tany ka tsy maintsy solafaka, miloloha lanitra ka tsy maintsy lena. Ny adala no tsy ambakaina, Andriamanitra no mahatahotra ; aza ny lohasaha mangina no heverina, fa Andriamanitra ao an-tampon'ny loha. Na izany aza, miandry ondry zato, miambina omby arivo; ka tsy ilaozan'izay mania. Misy ny manao an'Andriamanitra tsy hisy, ka mitsambiki-mikipy. Nefa avo fijery Andriamanitra, ka mahita ny takona. Ary Andriamanitra tsy omen-tsiny, Zanahary tsy omen-pondro fa ny olombelona no be siasia. Manoloana ny fahotantsika dia mbola manokatra ny fony Izy : tsy mifidy olon-kotiavina Andriamanitra.
Hanitr'Ony
Vaomieran’ny KOLONTSAINA

¤ VAOVAOM-PIANGONANA
1.	KOMONIO VOALOHANY Ny Alahady 7 Jona 2009 no handraisan’ireo ankizy eto amintsika ao amin’ny Katesizy ny KOMONIO VOALOHANY (Sakramentan’ny Eokaristia). Izany dia hankalazana ao amin’ny Fiangonana Saint Dominique 16, rue de la Tombe-Issoire Paris 14ème, amin’ny 3 ora tolak’andro - Métro : Saint Jacques (Ligne 6) na RER B Denfert-Rochereau.
2.	ANTSAM-PANAHY LEHIBE ATAON’NY ANTOKO MPIHIRANTSIKA Toy ny fanaony isan-taona dia ny Asabotsy 20 Jona 2009 no hanao ny ANTSAM-PANAHY lehibe ny ANTOKO MPIHIRA “Feon’Anjomara”, ho famaranana ny taom-pianarana amin’ny asa fitoriana an’I Jesoa Kristy nitsangan-ko velona. Koa dia efa mampiomana antsika mianakavy amin’ny fandraisana anjara sy fanotronana izany. Hisy ny fitondrana am-bavaka ny tanindrazantsika ka ny lohahevitra dia ny hoe : “GASIKARANAY, TAHIO”.
3.	MATSOM-PANAHY HATAON’NY TANORA Ny tanora dia hanao Matsom-panahy eny amin’ny Basilique du Sacré Cœur, eny Montamartre ny Alahady 24 May 2009. Efa misokatra ny fisoratana anarana. Ny Fiangonana no miantoka ny lany. Mamporisika ny fandraisan’anjara nyTanora rehetra.

ü FANANGANANA HO OLONTSAMBATRA
1.	Frera Raphaël-Louis RAFIRINGA Ny Alahady 07 Jona 2009, Alahadin’ny Trinite Masina, no hatao ao Antananarivo ny fananganana ho Olontsambatra an’i Frera Raphaël-Louis RAFIRINGA (1856 – 19 mai 1919). Izy moa no Frera Malagasy voalohany tao amin’ny Fikambanan’ny Frères des Ecoles Chrétiennes (Fianakaviam-be lasalianina). I Mgr Angelo AMATO, Préfet de la Congrégation pour la cause des Saints ao Vatican (Rome), no hitarika ny fotoana, misolontena ny Papa Ray Masina Benoît XVI. Hisy fankalazana izany manokana eto amin’ny FKMP ny Alahady 14 Jona 2009.

¦ soritr’asa manaraka
1.	KORANAM-PIANAKAVIANA MIARAKA AMIN’NY ANCMF Momba ny vaovao nasionaly dia hisy koa koranam-pianakaviana hatao eny Savigny le Temple (77), ny Asabotsy 27 Jona 2009 ho fankalazana ny Fetim-pirenena. Ny fanomanana sy ny fanatanterahana ny lanonana dia eo ambany fiahian’ny Birao Nasionaly. Toy ny natao teto amin’ny FKMP : dia hisy ny fitsinjarana ny asa, fangatahana “dons” ary ny fivarotana billets ka mamporisika ny tsirairay.

” FIZARANA ANDRAIKITRA
1.	MANENTANA LITORIZIA : F 24/05/2009 : Sampana ANTOKO MPIHIRA “Feon’Anjomara”
2.	MANADIO FIANGONANA : F 23/05/2009 : BIRAO

Rakitra farany

10/05/2009

174, 39 €