“Mifankatiava ianareo tahaka ny nitiavako anareo” ( Joany 15, 12 ) Fiangonana Katolika Malagasy Paris sy Ile-de-France 171 Boulevard Brune – 75 014 PARIS Site : http://www.fkmp.org/
H ISAN-TOKANTRANO
Alahady 26 Avrily 2009	N° 15
ALAHADY faha 3 – FANKALAZANA NY PAKA – TAONA B

Nitsangan-ko velona ny Tompo, vavolombelon’izany ny Apôstôly

Tafavory tao Jerosalema ny mpianatra iraika ambinifolo lahy sy ny vehivavy sasantsasany ary ny roalahy nandeha tany amin’ny vohitra atao hoe Emaosy. Samy nitantara ny fahitany ny nitsanganan’i Jesoa tamin’ny maty izy rehetra. Samy niaiky fa nitsangana tamin’ny maty i Jesoa. Mbola eo ampiresahana àry izy ireo no miditra I Jesoa sady niarahaba nanao hoe: “Ho aminareo anie ny fiadanana”

Fahatahorana sy tebiteby miaro hafaliana no nahazo ireo tafavory tao an-trano ireo satria noheveriny fa matoatoa I Jesoa. Fisehoana tsy mahazatra azy ireo ny toy izao ataon’I Jesoa izao.Ho an’ny Jody manko dia sarotra ny hino ny fitsanganan’ny vatana sy ny fanahy. Ho an’ny Greka ny fanahy no hinoany fa afaka amin’ny fanagejan’ny vatana rehefa maty ny vatana ( ho an’ireo philosophes idéalistes: Platon…). Tsy nahagaga arak’izany raha nitebiteby ireo Apôstôly sy ny namany teo am-pahitana an’I Jesoa tonga teo afovoany.

Tsapan’I Jesoa ireo tebiteby sy tahotra nahazo ny mpianatra sy ny namany ireo. Niezaka nampitony ny fahatairan’izy ireo I Jesoa. Noporofoiny fa tsy matoatoa Izy: nampisehoany ny tanany sy ny tongony, nangataka sakafo ho hanina Izy satria ny matoatoa tsy mihinana sakafo. Raha lazaina amin’ny teny fohy dia azo lazaina fa afa-nenina I Jesoa nanambara fa Izy marina no miseho.

Zavatra roa no tian’I Jesoa ho tratrarina amin’izao fisehoany izoa :

- Mba tsy hahakivy ny mpianatra izay nilaozany. Mahatsapa ny fahorian’izy ireo I Jesoa indrindra ny fanenjehana hahazo azy ireo ao aoriana kely ihany ka tonga mankahery azy ireo Izy.(Tadidio fa mbola mihidy aman-trano ireo mpianatra ireo amin’izao fisehoan’I Jesoa izao satria matahotra ny Jody. Fahoriana be!). Tsy hamela azy ireo ho kamboty Izy .Mbola haniraka ny Fanahy Masina Izy hanampy azy ireo.

- Mba hiaiky ny mpianatra fa I Jesoa dia Andriamanitra marina, nitsangana tamin’ny maty. Izy ireo no vavolombelon’izao fitsanganan’I Jesoa tamin’ny maty izao, ka handeha hitory Azy eran’izao tontolo izao. Sarotra manko ny hitory raha tsy mazava sy hita marina ny fahamarinan’ny zavatra ho toriana.

Manohy ny asan’ireo Apôstôly ireo isika amin’ny fitoriana an’I Jesoa maty sy nitsangana.Tsy nahita Azy mivantana nefa kosa mino amin’ny alalan’ny Soratra Masina sy ny ohatra velona nampitain’ireo olomasina efa nialoha lalana antsika. Matokisa fa tsy hamela antsika ho irery I Jesoa eo amin’izany fitoriana Azy izany.

P. Edmond RAKOTONDRAMANANA

Aumônier

DIMANCHE 26 AVRIL 2009 – 3^ème DIMANCHE DE PAQUES
Année B – Couleur liturgique : BLANC

& VAKITENY MASINA Voalohany
Boky mitantara ny Asan’ny Apôstôly			Asa. 3, 13 – 15 .17 - 19
Tamin’izany andro izany, dia niteny tamin’ny vahoaka I Piera nanao hoe : “Ny Andriamanitr’I Abrahama sy Isaaka ary I Jakoba, Andriamanitry ny razantsika, no nanome voninahitra an’I Jesoa Zanany, izay natolotrareo sy nolavinareo, teo anatrehan’I Pilaty, na dia nataony halefa aza Izy. Ny Masina sy ny Marina nolavinareo, fa ny lehilahy mpamono olona no nangatahanareo famelana. Ianareo namono ny Tompon’ny aina ; fa Andriamanitra kosa nanangana Azy ho velona ary izahay ireto vavolombelon’izany. Ary ankehitriny, ry hava-malala, fantatro tsara fa ny tsy fahalalana no nanaovanareo izany, toy izany koa ireo lehibenareo, fa notanterahin’Andriamanitra tamin’izany kosa izay voalazany rahateo amin’ny vavan’ny mpaminany rehetra, fa hijaly I Kristy. Koa mivaloza, ary mibebaha, mba hovonoina ny helokareo”.
Izany àry ny Tenin’ny Tompo	-	Hisaorana anie Andriamanitra !

& VAKITENY MASINA faharoa
Taratasy voalohan’i Md. Joany Apôstôly			1 Jo. 2, 1 – 5 a
Anaka, nanoratra aminareo aho, mba tsy hanotanareo. Ary raha misy manota, manana mpisolo vava ao amin’ny Ray isika, dia I Jesoa Kristy, Ilay marina. Izy no sorom-pifonana mahafaka ny fahotantsika ; ary tsy ny antsika ihany, fa ny an’izao tontolo izao koa. Ary izao no ahafantarantsika fa mahalala Azy isika, dia raha mitandrina ny didiny isika. Izay milaza fa mahalala Azy, nefa tsy mitandrina ny didiny, dia mpandainga, ary tsy ao anatiny ny marina. Fa izay mitandrina ny didiny, no manana ny fitiavana an’Andriamanitra lavorary ao Aminy tokoa.
Izany àry ny Tenin’ny Tompo	-	Hisaorana anie Andriamanitra !

& evanjely masina
Evanjely Masina nosoratan’i Md Lioka			Lk. 24, 35 - 48
Taminy’izany andro izany, dia notantarain’ny mpianatra avy tany Emaosy tamin’ny Apôstôly iraika ambin’ny folo lahy sy ny namany tafavory ny zavatra niseho taminy teny an-dalana sy ny nahafantarany an’I Jesoa tamin’ny famakiana ny mofo. Mbola niresaka toy izany eo izy ireo , dia niseho teo afovoany I Jesoa ka nanao taminy hoe : “ Homba anareo anie ny fiadanana ! Aza matahotra, fa izaho ihany”. Taitra sady natahotra izy ireo, fa nataony ho matoatoa no hitany. Ka hoy Izy taminy : “ Nahoana no mitebiteby ianareo , ary nahoana no miahanahana ao am-ponareo ? Zahao ny tanako sy ny tongotra, fa Izao mihitsy ity : tsapao ka jereo, fa ny matoatoa tsy mba mana-nofo aman-taolana tahaka izao ahitanareo Ahy izao ” . Ary rehefa nilaza izany Izy, dia nasehony azy ny tanany sy ny tongony. Ary ilay mbola tsy nino iny ihany izy ireo noho ny hafaliany, sady mbola talanjona , dia hoy I Jesoa taminy : “moa manan-kanina eto va ianareo ?” Dia notoloran’izy ireo tapa-kazandrano voatono sy tantely Izy, ka noraisiny dia nohaniny teo imason’izy rehetra , ary ny sisa nomeny azy ireo. Dia hoy Izy tamin’izy ireo : “ Izao no voalazako taminareo fony mbola teo aminareo Aho , fa tsy maintsy ho tanteraka izay rehetra voasoratra momba ahy ao amin’ny Lalàn’I Môizy sy ny Mpaminany ary ny Salamo”. Dia nosokafany ny sain’izy ireo hahafantatra ny Soratra Masina , ka hoy Izy taminy : “ Araka ny voasoratra , dia tsy maintsy hijaly I Kristy sy hitsangan-ko velona amin’ny andro fahatelo , ary tsy maintsy torîna amin’ny Firenen-drehetra , miantomboka amin’I Jerosalema , ny fibebahana sy ny famelan-keloka amin’ny Anarany . Ianareo no vavolombelon’izany”.
Izany àry ny Tenin’ny Tompo	-	Dera anie ho Anao, ry Kristy !

( fifampizarana NY HIRAN’ny ANTOKO MPIHIRA

Ny Tompo mahery no efa nijoro sy namiratra ka nandresy ny haizin’ny fahafatesana. Antoka lehibe ho an’ny fahafahana tokoa mantsy ny fitiavan’Andriamanitra. Novidian’i Kristy lafo ny fanafahana ny otantsika ka namoizany ny ainy. Koa mifohaza ry manan’aina rehetra hisaotra indrindra ilay mpahary. Reseo ny tahotra, tohery ny ratsy fa indro tongan y famonjena. Andeha ary izato izy, Mifohaza hitsena ny Tompo fa efa resiny ny fahafatesana !

Haja RAKOTOZAFY

Antoko Mpihira « Feon’Anjomara »

	NY SOA IFANDOVANA
« Raha hanta fa tsy ditra, miverena » « Ravina efa tsy tiako ka hapetrako ; ravina efa nalefitro ka holeferiko ; fa ny lefi-panahy efa nataoko taminao, razanaka, no efa nody saboha (loza) maro nifanontona, ka izany no maha-farofy anao. Fa ny anarako dia Andriamiroborobotsimirehitra, Andriamoratiamorakivy ; ka raha hendry ianao, mora tia aho, fa raha tsy hendry ianao, mora mahafoy aho ; raha miholy (mivadika) maimaim-poana ianao, dia izaho no afa-po mialoha. Ary raha ditra no ampianao avona, dia mandehana, fa izaho manam-be hamolahana. Ary raha dongy kosa no ampianao hanta, dia miverena, fa irainao ampy ihantàna : fa izay manan-dray miangola, ary izay manan-dreny mihanta ».
Vaomieran’ny Kolon-tsaina

¤ VAOVAOM-PIANGONANA
1.	KOMONIO VOALOHANY Ny Alahady 7 Jona 2009 ny Fankalazana ny KOMONIO VOALOHANY ho raisin’ireo ankizy ao amin’ny Katesizy eto amintsika.
2.	ANTSAM-PANAHY LEHIBEN’NY ANTOKO MPIHIRANTSIKA Toy ny fanaony isan-taona dia ny Asabotsy 20 Jona 2009 no hanao ny ANTSAM-PANAHY lehibe ny ANTOKO MPIHIRA “Feon’Anjomara”, ho famaranana ny taom-pianarana amin’ny asa fitoriana an’I Jesoa Kristy nitsangan-ko velona. Koa dia efa mampiomana antsika mianakavy amin’ny fandraisana anjara sy fanotronana izany.

¦ soritr’asa manaraka
1.	ZAIKAM-PARITRA : Araka ny vaovao nomena antsika tamin’ny Paka dia nahemotra amin’ny fotoana manaraka ny Zaikam-paritra izay kasaina hatao ny 1 sy 2 May 2009. Kasaina hatao indray amin’ny volana Oktobra 2009
2	KORANAM-PIANAKAVIANA MIARAKA AMIN’NY ANCMF : Momba ny vaovao nasionaly dia hisy koa koranam-pianakaviana hatao eny Savigny le Temple (77), ny Asabotsy 27 Jona 2009 ho fankalazana ny Fetim-pirenena. Mbola homena antsika ny antsipiriany amin’izany

” FIZARANA ANDRAIKITRA
1.	MANENTANA LITORIZIA : F 03/05/2009 : Ireo Pretra sy Relijiozy Malagasy (Fetin’ny Mpiandry Ondry Tsara)
2.	MANADIO FIANGONANA : F 02/05/2009 : Vaomieran’ny Kolon-tsaina

€ Rakitra farany	19/04/2009	173,65 €
	Ezaka Karemy (Hoan’ny CCFD)	202,07 €