“Mifankatiava ianareo tahaka ny nitiavako anareo”

( Joany 15, 12 )

Fiangonana Katolika Malagasy Paris sy Ile-de-France

171 Boulevard Brune – 75 014 PARIS

Site : http://www.fkmp.org/

 

H ISAN-TOKANTRANO

Alahady 19 JONA 2011

N° 112

ALAHADY TRINITE MASINA – TAONA A

 

TRINITE MASINA

 

Ny Trinite Masina, Andriamanitra Tokana nefa olona telo, no anisan’ny mampiavaka antsika kristianina amin’ireo finoana hafa mino an’Andriamanitra Tokana, toy ny Jody sy ny Silamo.  Sarotra nefa koa mora ny mahazo an’io Andriamanitra Tokana olona Telo io. Raha raisina ara-batana dia sarotra satria manahirana ny hanambatra olona telo ho tonga iray. Lasa olona sampona. Fa mora ny mahazo Azy raha jerena eo amin’ny Asam-mpamonjena nataon’Andriamanitra ho an’ny olona.

Niara-niasa ireo Andriamanitra Telo ireo teo amin’ny tantaram-pamonjena ny olombelona. Ilay Teny voalohany tao amin’Andriamanitra zary tonga nofo noho ny herin’ny Fanahy Masina no nanambara an’Andriamanitra Ray. Sarotra ho an’ny olona manko no mino an’Andriamanitra Ray tsy hita maso hany ka nalefany io Zanany ny io mba hinoan’ny olona Azy. Mitovy amin’Andriamanitra Ray izay naniraka io Andriamanitra zanaka izay nirahina  io. « Izay mahita Ahy dia mahita ny Ray » hoy i Jesoa Andriamanitra Zanaka. Tsy misy ambony na ambany ireo Andriamanitra ireo fa mitovy tanteraka. Rehefa nahavita ny nanirahana Azy Andriamanitra Zanaka dia niakatra any amin’Andriamlanitra Ray ary naniraka ny Andriamanitra Fanahy mba hanamasina ny Fiangonana. Raha fehezina amin’ny teny tokana dia ny fitiavana ny olombelona no nanosika ireo Andriamanitra ireo. Ary ao amin’io Fitiavana io no maha Andriamanitra Tokana olona Telo Azy.

Nahavita zavatra io Andriamanitra Tokana Olona Telo io satria nifankatia. Modely tsara tokony ho tahafin’ny fianakaviana kristianiana. Tsy misy zavatra tsy vita rehefa mifankatia ny fianakaviana iray. Raha sendra ny mafy ka mifanohana sy mifanakatia ny ray aman-dreny sy ny zanaka dia tsy misy ny hatahorana. Izany no hankaherezan’i Md Paoly Apôsitôly ireo kristianina tany Korinto mba hifankatia, hiray hevitra ary hifanao veloma amin’ny fanorohana masina. (Vakiteny faharoa)

Amin’izao fetin’ny raim-pianakaviana izao dia mirary anareo ray rehetra ato amin’ny FKMP ny tenako mba ho:d hambinin-java-tsoa eo amin’izay rehetra ataonareo. Ary enga anie ianareo ho toa an’Andirmanitra Ray ka hanohy hatrany ny fifankatiavanareo ao amin’ny vady aman-janakareo.

 

P. Edmond RAKOTONDRAMANANA

Aumônier


DIMANCHE 19 JUIN 2011 – MESSE DE LA SAINTE TRINITE

Année A – Couleur liturgique : BLANC

 

 

& VAKITENY MASINA Voalohany

 

Boky Eksaody

Eks. 34, 4b – 6. 8 – 9

Ny Tompo Andriamanitra dia mamindra fo sy miantra.

Tamin’izany andro izany, dia nifoha maraina koa I Môizy, niakatra ny tendrombohitra Sinaia, araka ny nandidian’ny Tompo azy ; nentin’ny teny an-tanany ny takelaka vato roa. Dia nidina tao anatin’ny rahona ny Tompo ka niara-nijanona taminy teo, sy nanonona ny anarana hoe : Iaveh ! Tompo ! Ary nandalo teo anatrehany ny Tompo sady niantso hoe : “Izaho no Iaveh Tompo, Andriamanitra mamindra fo sy miantra, mahari-po sy be hatsaram-po amam-pahamarinana”. Niondrika tamin’ny tany niaraka tamin’izay I Môizy, dia niankohoka, nanao hoe : “Raha nahita fitia teo imasonao aho, ry Tompo, aoka re mba hiaraka aminay ny Tompo, fa vahoaka mafy hatoka ity. Avelao ny heloka amam-pahotanay, ary raiso ho lovanao izahay”.

 

Izany àry ny Tenin’ny Tompo

-

Hisaorana anie Andriamanitra !

 

& VAKITENY MASINA faharoa

 

Taratasy faharoan’I Md Paoly Apôstôly ho an’ny Kristianina tany Kôrinty

2 Kôr. 13, 11 – 13

Homba anareo anie ny fahasoavan’I Jesoa Kristy, sy ny fitiavan’Andriamanitra, ary ny firaisana ao amin’ny Fanahy Masina.

Ry Kristianina havana, mifalia, miezaha ho lavorary, mifanalà alahelo, miraisa hevitra, mihavàna tsara, dia ho eo aminareo ny Andriamanitry ny fitiavana amam-piadanana. Mifanaova veloma amin’ny fanorohana masina. Manao veloma anareo ny olo-masina rehetra. Ho aminareo rehetra anie ny fahasoavan’I Jesoa Kristy Tompo, sy ny fitiavan’Andriamanitra, ary firaisana ao amin’ny Fanahy Masina !

 

Izany àry ny Tenin’ny  Tompo

-

Hisaorana anie Andriamanitra !

& EVANJELY MASINA

 

Evanjely Masina nosoratan’i Md. Joany

Jo. 3, 16 – 18

Nirahin’Andriamanitra ny Zanany mba hamonjy izao tontolo izao amin’ny alalany.

Tamin’izany andro izany, I Jesoa nilaza tamin’I Nikôdema hoe : “Lehibe tokoa ny fitiavan’Andriamanitra izao tontolo izao : nomeny ny Zanany lahy tokana, mba tsy ho very izay rehetra mino Azy, fa hanana fiainana mandrakizay. Fa Andriamanitra tsy naniraka ny Zanaka tamin’izao tontolo izao, mba hitsara izao tontolo izao, fa mba hamonjy izao tontolo izao. Izay mino Azy dia tsy tsaraina : fa izay tsy mino kosa dia efa voatsara rahateo, satria tsy mino ny Anaran’ny Zanak’Andriamanitra tokana”.

 

Izany àry ny Tenin’ny Tompo

-

Dera anie ho Anao, ry Kristy !

 

 

( fifampizarana

 

 

MIJOROA HATRANY HO VAVOLOMBELON’I KRISTY : FIFANKATIAVANA

 

Herinandro aorian’ny Pantekôty izay nandraisantsika ny fanomezan’ny Fanahy Masina, dia manasa antsika ny Fiangonana handinika ny mistery lehibe fonosin’ny Trinité Masina. Isaky ny mamonjy Sorona Masina isika, dia manambara io mistery io : Andriamanitra tokana, tokana Olona telo, dia ny Ray sy Zanaka ary ny Fanahy Masina.

 

Nomena ny Fanahy Masina isika tamin’ny Batemy mba hiray aina amin’ny Kristy sy ho zanaky ny Ray.

Amin’ny maha zanak’Andriamanitra sy maha kristianina antsika dia ny fifankatiavana sy ny fifanampiana no tokony ho fototry ny fiainantsika andavanandro, na ao an-tokantrano, na any am-piasana, na eto am-piangonana. Manamafy izany ny hafatr’i Md Paôly Apôstôly ho an’i kristianina tany Korinto.

 

Samia ary isika mangataka amin’ny Fanahy Masina mba hijoro hatrany ho vavolombelon’i Kristy sy hampanjaka ny fifankatiavana eo amin’ny fiainantsika andavan’andro.

 

RATSIMBAZAFY Ndrenja

Vaomieran’ny Fitantanana

 

¦soritr’asa manaraka SY VAOVAO SAMIHAFA

1.

ANTOKO MPIHIRA “FEON’ANJOMARA” MANEHO FISAORANA

Ny Antoko Mpihira “Feon’anjomara” dia maneho etoana ny fisaorana sy fankasitrahana antsika mianakavy tamin’ny fiaraha-mivavaka an-kira, Antsam-panahy, omaly Asabotsy 18 Jona 2011 teto am-piangonana : “Mifalia mandrakariva, mivavaha ka aza mitsahatra, misaora amin’ny zavatra rehetra” 1 Tes. 5, 16 – 18a

Fotoan-dehibe tokoa izany eo amin’ny fiainan’ny Antoko Mpihira sy eo amin’ny fiainam-panahintsika rehetra eto amin’ny FKMP fa izay mihira, hono, dia mivavaka indroa.

2.

FFKM FRANTSA : ALAHADY 26 JONA 2011 – FETIM-PIRENENA MALAGASY

Ny Alahady 26 Jona dia misy fiaraha-mivavaka ekiomenika karakarain’ny FFKM FRANTSA, ho fangatahim-pitahiana ho an’ny Tanindrazana, amin’ny fitsingerenana ny taona niverenan’ny Fahaleovantena. Fetim-pirentsika Malagasy ny 26 Jona koa Asaramanitra dia iaraha-mankalaza. Tadidio àry ny fotoana :

 

Paroisse Notre Dame des Champs

91, Boulevard du Montparnasse

 75 006 Paris

Fizarana andraikitra :

 

§  Mpitarika : Ny Fiangonana Prôtestanta

§  Mpandray sy mitoriteny : Ny Fiangonana Anglikanina

§  Vakiteny sy Ranombavaka : Ny Fiangonana Katôlika

 

Métro : Vavin, Montparnasse, Notre Dame des Champs

Bus : 95, 96, 58, 82, 28

Aorian’ny fanompoam-pivavahana dia hisy fiaraha-miala hetaheta izay anasana antsika rehetra.

Tsy misy Lamesa eto amin’ny Fiangonantsika amin’io. Samy mamonjy Lamesa any amin’ny Paroasy misy azy avy sady Fetin’ny Sakramenta Masina amin’io.

3.

ZAIKABEN’NY TANORA KATOLIKA MALAGASY : 13 – 14 – AOUT 2011

Mampatsiahy sy mampiomana dieny izao izany fa ny Zaikaben’ny tanora Katolika Malagasy eto Frantsa dia hatao ny 13 – 14 – 15 Août 2011 any Bordeaux . Araka ny hafatra nalefan’ny Birao Nasionaly, dia toy izao ny fitsinjarana ny fandraisana anjara eo amin’ny fampiantranoana sy ny sakafo any toerana (Hébergement et Restauration) :

 

30 % iantohan’ny tanora mpandray anjara

35 % iantohan’ny Fiangonana niaviany

35 % iantoan’ny ANCMF

 

Izany no natao dia mba ho maro ny tanora handray anjara ka hanamaivana ny fandraiasana anjara ara-bola; Koa iangaviana ny mpandrindra ny Vaomieran’ny tanora hanomana ny fisoratana anarana sy ny antsipîriany mikasika io Zaikabe io.

 

” FIZARANA ANDRAIKITRA

1.

MANENTANA LITORIZIA :

26/06/2011 : FFKM FRANTSA (Fetim-pirenena)

03/07/2011 : VAOMIERAN’NY KOLONTSAINA (Alahady faha-14 Mandavantaona – Taona A)

2.

MANADIO FIANGONANA :

25/06/2011 : VAOMIERAN’NY KOLONTSAINA

02/07/2011 : VAOMIERAN’NY FIARAHA-MONINA